ایجنسیز
جموں؍ یکم جون
وزارت داخلہ نے سینئر آئی پی ایس افسر وِدی کمار بردی، جو اس وقت انسپکٹر جنرل آف پولیس (آئی جی پی) کشمیر کے طور پر خدمات انجام دے رہے ہیں، کو مرکزی ڈیپوٹیشن پر سنٹرل ریزرو پولیس فورس (سی آر پی ایف) میں انسپکٹر جنرل مقرر کیا ہے۔
وزارت داخلہ کی جانب سے جاری ایک سرکاری یادداشت (آفس میمورنڈم) کے مطابق۲۰۰۳ بیچ کے اے جی ایم یو ٹی کیڈر کے آئی پی ایس افسر وِدی کمار بردی کو سی آر پی ایف میں موجود خالی آسامی کے خلاف تنخواہ میٹرکس کے لیول۱۴ میں تعینات کیا گیا ہے۔ ان کی تقرری مرکزی ڈیپوٹیشن کی معمول کی شرائط و ضوابط کے تحت عمل میں لائی گئی ہے۔
وزارت نے جموں و کشمیر انتظامیہ سے درخواست کی ہے کہ بردی کو فوری طور پر سبکدوش کیا جائے تاکہ وہ مرکز میں اپنی نئی ذمہ داریاں سنبھال سکیں۔
وِدی کمار بردی گزشتہ کچھ عرصے سے وادی کشمیر میں آئی جی پی کشمیر کے طور پر خدمات انجام دے رہے تھے اور امن و قانون کی صورتحال، انسدادِ دہشت گردی کارروائیوں اور سیکورٹی انتظامات میں ان کا اہم کردار رہا ہے۔
ان کی تقرری کو مرکزی سطح پر ایک اہم انتظامی تبدیلی کے طور پر دیکھا جا رہا ہے۔
