سرینگر؍ یکم جون
سرینگر کے نگین کلب علاقے کے نزدیک نگین جھیل میں نہاتے ہوئے ایک کمسن لڑکا ڈوب کر جاں بحق ہوگیا۔
سرکاری ذرائع نےبتایا کہ واقعے کی اطلاع ملتے ہی ایس ڈی آر ایف نگین سمیت ریسکیو ٹیموں نے فوری طور پر بچاؤ کارروائی شروع کی۔
انہوں نے بتایا کہ لڑکے کو جھیل سے نکال کر سب ضلع اسپتال حضرت بل (حبک) منتقل کیا گیا، جہاں ڈاکٹروں نے اسے مردہ قرار دیا۔
متوفی کی شناخت نازل شکیل بٹ ولد شکیل احمد بٹ ساکن نوہٹہ، سری نگر کے طور پر کی گئی ہے۔
دریں اثنا، پولیس نے واقعے کا نوٹس لے کر مزید کارروائی شروع کر دی ہے۔
اس دوران لدر میں ڈوبے شہری کی تلاش آج دوسرے روز بھی جاری رہی ۔محمد اشرف میر ولد غلام محی الدین میر، ساکن جواہر نگر سری نگر اتوار کے روز اپنے اہل خانہ کے ہمراہ تفریح کی غرض سے پہلگام گئے ہوئے تھے۔
عینی شاہدین اور مقامی ذرائع نے بتایا کہ خاندان لنگن بل میں کولاہوئی گرین ہوٹل کے قریب دریائے لیدر کے کنارے تصاویر لے رہا تھا کہ اسی دوران ان کا بیٹا فہد اچانک پھسل کر تیز بہاؤ والے دریا میں جا گرا۔
مقامی افراد کے مطابق محمد اشرف میر نے فوری طور پر اپنے بیٹے کو بچانے کے لیے دریا میں چھلانگ لگا دی، تاہم وہ اپنا توازن برقرار نہ رکھ سکے اور تیز پانی کے بہاؤ میں بہہ گئے۔
واقعے کے وقت موقع پر موجود مقامی لوگوں نے بروقت کارروائی کرتے ہوئے بچے کو بحفاظت نکال لیا، تاہم محمد اشرف میر دریا میں لاپتہ ہوگئے اور ان کے ڈوب جانے کا خدشہ ظاہر کیا جا رہا ہے۔
واقعے کے فوراً بعد انتظامیہ نے بڑے پیمانے پر تلاش اور بچاؤ آپریشن شروع کیا۔ اسٹیٹ ڈیزاسٹر ریسپانس فورس (ایس ڈی آر ایف) کی ٹیمیں، مقامی رافٹنگ گروپس اور رضاکار مشترکہ طور پر دریائے لیدر کے مختلف حصوں میں لاپتہ شخص کی تلاش میں مصروف ہیں۔حکام کا کہنا ہے کہ محمد اشرف میر کا سراغ لگانے کے لیے ریسکیو آپریشن مسلسل جاری ہے۔
