امن و خوشحالی کی دعا‘عید کو بھائی چارے کی علاقت قرار دیا
(ویب ڈیسک )
سرینگر؍۲۶مئی
لیفٹیننٹ گورنر منوج سنہا نے منگل کو عیدالاضحیٰ کے موقع پر عوام کو دلی مبارکباد پیش کرتے ہوئے سب کے لیے امن، خوشی اور خوشحالی کی دعا کی۔
اپنے پیغام میں لیفٹیننٹ گورنر نے لوگوں کو مبارکباد پیش کرتے ہوئے عیدالاضحیٰ کو قربانی، اتحاد اور بھائی چارے کی علامت قرار دیا۔
سنہا نے کہا کہ یہ مقدس موقع انسانیت کو محبت، ہمدردی اور درگزر جیسی لازوال قدروں کی یاد دلاتا ہے اور لوگوں کو فرقہ وارانہ ہم آہنگی اور باہمی احترام کو مضبوط بنانے کی ترغیب دیتا ہے۔
ادھر جموں و کشمیر کے وزیر اعلیٰ عمر عبداللہ نے بھی منگل کو عیدالاضحیٰ کے مبارک موقع پر عوام کو گرمجوشی کے ساتھ مبارکباد پیش کرتے ہوئے سب کے لیے امن، خوشحالی اور مسرت کی دعا کی۔
اپنے تہنیتی پیغام میں وزیر اعلیٰ نے کہا کہ عیدالاضحیٰ قربانی، ہمدردی، سخاوت اور اللہ تعالیٰ پر کامل ایمان کی اقدار کی عکاسی کرتی ہے۔ انہوں نے کہا کہ یہ مقدس موقع لوگوں کو بھائی چارے، مہربانی اور انسانیت کی بے لوث خدمت کے جذبے کو فروغ دینے کی ترغیب دیتا ہے۔
حضرت ابراہیمؑ کی عظیم قربانی اور حضرت اسماعیلؑ کی بے مثال اطاعت و وفاداری کو یاد کرتے ہوئے عمر عبداللہ نے کہا کہ ان کی میراث آج بھی انسانیت کو راست بازی، صبر اور اللہ کی رضا کے سامنے سر تسلیم خم کرنے کا درس دے رہی ہے۔
وزیر اعلیٰ نے امید ظاہر کی کہ یہ تہوار جموں و کشمیر میں فرقہ وارانہ ہم آہنگی، باہمی احترام اور سماجی اتحاد کو مزید مضبوط بنائے گا۔ انہوں نے لوگوں سے اپیل کی کہ وہ عید کی خوشیوں میں غریبوں، ضرورت مندوں اور محروم طبقوں کو بھی یاد رکھیں اور ان کے ساتھ خوشیاں بانٹیں۔
عمر عبداللہ نے عوام کے لیے دائمی امن، خوشحالی اور فلاح و بہبود کی دعا کرتے ہوئے امید ظاہر کی کہ یہ بابرکت موقع ہر گھرانے کے لیے خوشیوں اور برکتوں کا باعث بنے گا۔
