ایجنسیز
نئی دہلی؍۲۶ مئی
دہلی ہائی کورٹ نے منگل کو جیل میں بند بارہمولہ کے رکن پارلیمان شیخ عبدالرشید المعروف انجینئر رشید کو اپنے والد کی بعد از وفات رسومات میں شرکت کے لیے۲۵جون سے۳۰جون تک عبوری ضمانت دے دی۔
جسٹس پرتھیبا ایم سنگھ اور جسٹس مدھو جین پر مشتمل بنچ نے تاہم رشید کو ہدایت دی کہ وہ۱۸ مئی کو دی گئی عبوری ضمانت کی مدت ختم ہونے کے بعد۲جون کو خودسپردگی کریں۔
رشید کے سینئر وکیل نے عدالت سے گزارش کی کہ دہشت گردی فنڈنگ الزامات کا سامنا کرنے والے رکن پارلیمان کو دی گئی عبوری ضمانت میں توسیع کی جائے تاکہ وہ سری نگر میں اپنے والد کی تدفین کے چالیسویں دن منعقد ہونے والی بعض مذہبی رسومات میں شرکت کر سکیں۔
عدالت نے حکم دیا، ’’۲ون کو عبوری ضمانت کی مدت ختم ہونے کے بعد اپیل کنندہ خودسپردگی کرے گا۔ تاہم۲۵ جون سے۳۰جون تک کی مدت کے لیے اپیل کنندہ کو دوبارہ عبوری ضمانت دی جاتی ہے تاکہ وہ چالیسویں دن کی رسومات اور تقاریب میں شرکت کر سکے۔‘‘
عدالت نے کہا کہ۲۵تا۳۰جون دی جانے والی عبوری ضمانت انہی شرائط کے تحت ہوگی جو رشید کی موجودہ رہائی کی مدت پر لاگو ہیں۔۱۸مئی کو بنچ نے رشید کی عبوری ضمانت کے دوران کئی شرائط عائد کی تھیں، جن میں یہ بھی شامل تھا کہ ان کے ساتھ ہمیشہ سادہ لباس میں کم از کم دو پولیس اہلکار موجود رہیں گے، جو تہاڑ جیل سے روانگی کے آغاز سے لے کر سری نگر سے واپسی تک ان کے ساتھ رہیں گے۔
عدالت نے کہا تھا کہ انہیں قبرستان یا کسی بھی عبادت گاہ جانے کی اجازت ہوگی، تاہم انہیں اپنی رہائش گاہ کے علاوہ کہیں اور جانے کی اجازت نہیں ہوگی۔
۲۸ اپریل کو عدالت نے انہیں سری نگر میں اپنے علیل والد سے ملاقات کے لیے ایک ہفتے کی عبوری ضمانت دی تھی۔ بعد ازاں ان کے والد کو علاج کے لیے یہاں ایمس منتقل کیے جانے کے بعد یہ مدت۱۰مئی تک بڑھا دی گئی تھی۔
رشید دہشت گردی فنڈنگ معاملے میں مقدمے کا سامنا کر رہے ہیں۔ ان پر الزام ہے کہ انہوں نے جموں و کشمیر میں علیحدگی پسندوں اور دہشت گرد تنظیموں کو فنڈ فراہم کیے۔ قومی تحقیقاتی ایجنسی (این آئی اے) نے انہیں۲۰۱۷ کے اس معاملے میں گرفتار کرنے کے بعد سے۲۰۱۹سے دہلی کی تہاڑ جیل میں بند رکھا ہوا ہے۔
اکتوبر۲۰۱۹میں چارج شیٹ میں نامزد کیے جانے کے بعد، مارچ۲۰۲۲میں این آئی اے کی خصوصی عدالت نے رشید اور دیگر کے خلاف تعزیراتِ ہند کی دفعات۱۲۰بی (مجرمانہ سازش)،۱۲۱ (حکومت کے خلاف جنگ چھیڑنا) اور۱۲۴؍اے (بغاوت) کے تحت، نیز غیر قانونی سرگرمیاں (انسداد) قانون کی متعلقہ سخت دفعات کے تحت فرد جرم عائد کی تھی۔(ایجنسیاں)
