’ مقصد حج کے عالمی اثر کو مزید مؤثر بنانا‘ جدید ٹیکنالوجی اور ڈیجیٹل ذرائع کو اسلام اور مسلمانوں کی خدمت کیلئے استعمال کرنا ہے‘
(ویب ڈیسک )
سرینگر؍۲۰مئی
مسجد الحرام اور مسجد نبوی کے امورِ دینیہ کی صدارت نے اعلان کیا ہے کہ۱۴۴۷ہجری کے یومِ عرفہ کے خطبے کا ترجمہ۳۵عالمی زبانوں میں ڈیجیٹل پلیٹ فارمز اور ادارے سے وابستہ چینلز کے ذریعے نشر کیا جائے گا، تاکہ اسلام کے معتدل پیغام اور خطبے کے شرعی مضامین دنیا بھر کے مسلمانوں تک پہنچائے جا سکیں۔
ایک میڈیا رپورٹ کے مطابق یہ اقدام سعودی عرب کی ان مسلسل کوششوں کا حصہ ہے، جن کا مقصد موسمِ حج کے عالمی اثر کو مزید مؤثر بنانا، جدید ٹیکنالوجی اور ڈیجیٹل ذرائع کو اسلام اور مسلمانوں کی خدمت کے لیے استعمال کرنا اور دینی پیغامات کو مختلف زبانوں میں زیادہ وسیع پیمانے پر پہنچانا ہے۔
رئیسِ امورِ دینیہ ڈاکٹر عبدالرحمن السدیس نے کہا ہے کہ خطبۂ عرفہ کا ترجمہ سعودی عرب کی ان کوششوں کا تسلسل ہے ،جو اسلام اور مسلمانوں کی خدمت اور حجاجِ کرام کی دیکھ بھال کے لیے کی جا رہی ہیں۔
ان کاکہنا تھا’’یہ سب کچھ قیادت کی جانب سے حرمین شریفین اور حج کے نظام کو دی جانے والی بھرپور توجہ اور حمایت کے تحت انجام پا رہا ہے‘‘۔
انہوں نے مزید وضاحت کی کہ یہ اقدام خطبۂ عرفہ کے دینی اور انسانی پیغامات کو دنیا بھر کے مسلمانوں تک ان کی مختلف زبانوں اور ثقافتوں میں پہنچانے میں اہم کردار ادا کرے گا۔
ڈاکٹر عبدالرحمن السدیس نے کہا ہے کہ خطبۂ عرفہ کے ترجمے کا منصوبہ ان نمایاں اور منفرد اقدامات میں سے ہے جن میں امورِ دینیہ کی صدارت نے برسوں کے دوران وسیع تجربہ اور مہارت حاصل کی ہے۔
اس منصوبے نے دینی مواد کو مختلف عالمی زبانوں میں بہتر بنانے اور مزید مؤثر انداز میں پیش کرنے میں اہم کردار ادا کیا ہے۔
انہوں نے مزید کہا کہ اس اقدام نے غیر عربی زبان بولنے والے مسلمانوں کو خطبۂ عرفہ کے پیغام، اس کی اقدار، رواداری، اعتدال اور اسلامی وحدت جیسے اہم اصولوں سے مستفید ہونے کا موقع فراہم کیا ہے۔
ڈاکٹر عبدالرحمن السدیس نے واضح کیا کہ امورِ دینیہ کی صدارت نے اپنی تکنیکی اور ابلاغی صلاحیتوں اور ماہر افرادی قوت کو بروئے کار لاتے ہوئے خطبے کی اعلیٰ معیار اور پیشہ ورانہ انداز میں ترسیل کو یقینی بنایا ہے۔
اس کا مقصد یہ ہے کہ خطبہ دنیا بھر کے زیادہ سے زیادہ مسلمانوں تک مؤثر طریقے سے پہنچ سکے اور اسے مختلف ڈیجیٹل پلیٹ فارمز اور ادارے سے وابستہ میڈیا چینلز کے ذریعے نشر کیا جائے۔
دریں اثنا سعودی وزارت داخلہ نے حج پرمٹ کے بغیر۱۳؍افراد کو مکہ مکرمہ لے جانے کی کوشش کرنے والے۴غیرملکیوں اور۳شہریوں کو حج ضوابط کی خلاف ورزی کے الزام میں گرفتار کیا ہے۔
سعودی خبررساں ادارے ایس پی اے کے مطابق وزارت نے منگل کو سیزنل انتظامی کمیٹیوں کے ذریعے ٹرانسپورٹرز اور خلاف ورزیوں کے مرتکب ہر شخص کے خلاف انتظامی فیصلے جاری کیے۔
سزاؤں میں قید، ایک لاکھ ریال تک جرمانے اور تشہیر شامل ہے۔ پرمٹ کے بغیر حج کرنے کی کوشش پر۲۰ ہزار ریال تک جرمانہ، غیرملکیوں کی مملکت سے بے دخلی اور سزا پوری ہونے کے بعد۱۰سال تک مملکت میں دوبارہ داخلے پر پابندی ہوگی۔
خلاف ورزی میں استعمال ہونے والی گاڑیوں کو ضبط کرنے کے لیے قانونی کارروائی بھی کی جائے گی۔وزارت نے سعودی شہریوں اور غیرملکیوں پر زور دیا کہ وہ حج قوانین اور ضوابط پر سختی سے عمل کریں۔
