ایجنسیز
سرینگر؍۲۰ مئی
سنٹرل یونیورسٹی کشمیر (سی یو کے) نے تعلیمی سرگرمیوں کے تسلسل کو یقینی بنانے اور اخراجات میں کٹوتی کے اقدامات کے تحت جمعہ اور’گرین ہفتہ‘کو تدریسی اور غیر تدریسی عملے کے لیے آن لائن تدریس اور ’ورک فرام ہوم‘ کا نظام لاگو کرنے کی ہدایت دی ہے۔
سی یو کے جزوی طور پر آن لائن تدریس کی طرف رخ کرنے والا پہلا تعلیمی ادارہ بن گیا ہے۔
واضح رہے کہ وزیر اعظم نریندر مودی نے حال ہی میں عالمی سطح پر توانائی کے بڑھتے ہوئے خدشات کے پیش نظر اداروں سے ایندھن کی کھپت کو کم کرنے کی اپیل کی تھی۔
یونیورسٹی انتظامیہ کی جانب سے۱۳ مئی کو منعقدہ ’ڈینز کمیٹی‘ کے اجلاس کے بعد جاری کیے گئے اور وائس چانسلر سے منظور شدہ سرکاری حکم نامے کے مطابق، نیا نظام۲۲ مئی سے اگلے احکامات جاری ہونے تک نافذ رہے گا۔ اس ہفتے سے یونیورسٹی جمعہ اور ’گرین ہفتہ‘ کو تدریسی اور غیر تدریسی دونوں ملازمین کے لیے آن لائن کلاسز اور ورک فرام ہوم کی سہولت فراہم کرے گی۔
حکم نامے میں تعلیمی اور انتظامی سرگرمیوں کو برقرار رکھنے کے لیے کئی اہم ہدایات جاری کی گئی ہیں۔ تعلیمی شیڈول میں کسی قسم کی رکاوٹ سے بچنے کے لیے جمعہ کے روز ہونے والی تمام پریکٹیکل اور لیبارٹری کلاسز اب جمعرات کی دوپہر میں منعقد کی جائیں گی۔
اس کے علاوہ شعبہ جاتی اور اسکول سطح کی میٹنگز، پی ایچ ڈی وائیوا اور ورکشاپس کو جہاں تک ممکن ہو آن لائن منعقد کرنے کی ہدایت دی گئی ہے۔ آف لائن میٹنگز کی اجازت صرف غیر معمولی حالات میں اور مجاز اتھارٹی کی پیشگی منظوری کے بعد ہی دی جائے گی، خاص طور پر ان مواقع پر جب ایک ہی وقت میں متعدد سرگرمیوں کو سنبھالنا ضروری ہو۔
یونیورسٹی انتظامیہ کے مطابق یہ اقدامات لاگت میں کمی اور کام کی کارکردگی کو مزید بہتر بنانے کی وسیع تر پالیسی کا حصہ ہیں۔
