حج ایام میں موسم گرم رہے گا ‘ درجہ حرارت۴۷ڈگری سینٹی گریڈ تک رہنے کا امکان‘ سطحی ہوا کے ساتھ گرد وغبار رہنے کی توقع ہے
(ویب ڈیسک)
سرینگر؍۱۹مئی
مکہ مکرمہ اور مدینہ منورہ میں حج۱۴۴۷ ہجری کی تیاریاں عروج پر ہیں۔ دنیا بھر سے عازمینِ حج کے قافلے ان شہروں میں پہنچ رہے ہیں جہاں روحانی طمانیت کا اظہار تکبیرات کی آوازوں سے ہو رہا ہے۔ حکومتی اداروں نے مشاعرِ مقدسہ پر سہولیات کو جدید ٹیکنالوجی سے لیس کر دیا ہے۔
سعودی پریس ایجنسی کے مطابق ذوالحجہ کے ابتدائی دس دنوں میں مسلمانوں کے لیے تکبیر میں دراصل گہری وابستگی کے معانی پنہاں ہیں، جس میں عبادت اور اطاعت کے مقدس زمانے میں اللہ کی شان بیان کرنا اور اسلامی شعائر کی یاد تازہ کرنا شامل ہے۔مکہ اور دیگر مشاعرِ مقدسہ میں اس فضا کی جہت اور بھی گہری اور پُرمغز ہو جاتی ہے۔
تکبیرات کی آوازیں، مسجدالحرام اور آس پاس کے علاقوں سے بلند ہوتی ہیں جو دنیا بھر سے عازمینِ حج و عمرہ کی آمد سے ہم قدم ہو جاتی ہیں۔ اللہ کی یاد اور عبادت میں یہ وحدتِ خیال کا انتہائی طاقتور اظہار ہے۔
تکبیرات، اِن مقدس ایام میں سب سے نمایاں عمل کی نمائندگی کرتی ہیں کیونکہ یہ خدا کی واحدانیت، تکریم، اُس کے سامنے سر جھکا دینے اور شکر ادا کرنے کے اظہار کے معانی رکھتی ہیں۔
علمائے اسلام نے بھی یہ واضح کیا ہے کہ مسلم معاشروں میں تکبیرات، عقیدت کی فضا کو تقویت دیتی ہیں اور نسلوں کو عقیدے کے عملی اظہار کے طریقوں سے جوڑ دیتی ہیں۔
چونکہ یہ مقدس دن ہر سال واپس آتے ہیں اس لیے تکبیرات اسلامی شعور میں اپنے گہرے نقوش کے ساتھ موجود رہتی ہیں۔
انسان کے خالق کی عظمت، عبادت اور اُس کے تشکر کے لیے خوشی کا ایک اظہار بن جاتی ہیں اور مسلم دنیا کو امن و آشتی اور روحانی سکون سے بھر دیتی ہیں۔
اس دوران سعودی عرب کے قومی مرکز برائے موسمیات کے سی ای او ڈاکٹر ایمن غلام نے کہا ہے کہ’ سالِ رواں حج سیزن کے دوران مکہ مکرمہ اور مشاعر مقدسہ میں موسم انتہائی گرم رہنے کا امکان ہے۔‘
عکاظ کے مطابق ڈاکٹر ایمن غلام نے ایام حج کے میں موسمیاتی حالات کے حوالے سے بتایا’ یکم ذو الحجہ سے یوم الترویہ (۸ذی الحجہ) تک گرمی عروج پر ہوگی جبکہ سطحی ہوا کے ساتھ گرد وغبار رہنے کی توقع ہے۔‘
’ایام حج میں زیادہ سے زیادہ درجہ حرارت۴۴ سے۴۷ ڈگری سینٹی گریڈ اور کم سے کم۲۸سے۳۱ ڈگری سینٹی گریڈ تک رہنے کا امکان ہے، جبکہ ہوا میں نمی کا تناسب۱۰ فیصد سے۴۰ فیصد تک ہوگا۔‘
موسمیاتی مرکز کے سی ای او کا مزید کہنا تھا’ یوم عرفہ سے۱۳ذو الحجہ تک موسم گرم رہنے کی توقع ہے، جبکہ آسمان جزوی طور پر ابرآلود رہے گا۔ دن کے وقت گرد آلود ہوا چلنے کا امکان ہے۔‘
’۹ذی الحجہ سے۱۳ تک درجہ حرارت میں معمولی کمی کی توقع ہے۔ اس دوران پارہ۴۲سے۴۴ڈگری جبکہ کم سے کم درجہ حرارت۲۶سے۲۹ڈگری سینٹی گریڈ تک ہوگا۔ ہوا میں نمی کا تناسب۱۵ سے۵۵ فیصد تک رہے گا۔‘
ایام حج میں ہوا کا رخ شمال سے مغربی جانب ہوگا جس کی رفتار۲۰ سے۵۰کلومیٹر فی گھنٹہ تک ہوسکتی ہے۔ اس بات کا بھی قوی امکان ہے کہ طائف کمشنری کے پہاڑی مقامات پر گرج چمک کے ساتھ بارش برسنے سے اس کے اثرات مشاعر مقدسہ تک پھیل جائیں۔
علاوہ ازیں ڈاکٹر ایمن غلام نے مشاعر مقدسہ میں موسمیاتی مرکز کا دورہاور حج ایام کے حوالے سے مرکز کی جانب سے کی جانے والی تیاریوں اور آپریشنل سسٹم کا جائزہ لیا۔
