’پولیس کارروائی کے دوران متاثرین سے زیادتیوں کا الزام ‘
ایجنسیز
جموں؍۱۹مئی
وزیر جنگلات جاوید احمد رانا نے منگل کو جموں شہر کے مضافاتی جنگلاتی علاقے میں انسدادِ تجاوزات کارروائی سے متاثرہ لوگوں سے ملاقات کی اور محکمہ جنگلات کی کارروائی کی تحقیقات کا حکم دیا۔
رانا نے لیفٹیننٹ گورنر منوج سنہا سے مطالبہ کیا کہ کارروائی کے دوران مبینہ زیادتیوں پر پولیس اہلکاروں کے خلاف ایف آئی آر درج کی جائے۔
وزیر نے الزام لگایا کہ پولیس نے کارروائی کے دوران طاقت کا استعمال کیا اور لوگوں کو نماز ادا کرنے کی بھی اجازت نہیں دی۔ انہوں نے کہا کہ قانون و نظم لیفٹیننٹ گورنر کے دائرہ اختیار میں آتا ہے، اس لئے وہ پولیس کے خلاف کارروائی کی درخواست کریں گے۔
واضح رہے کہ پولیس اور محکمہ جنگلات کی ٹیموں نے جموں شہر کے مضافاتی علاقے لوئر شوالک رینج کے رائیکہ بندی جنگلاتی پٹی میں بڑے پیمانے پر انسدادِ تجاوزات مہم چلائی۔ حکام کے مطابق کارروائی کے دوران۳۰ سے زائد ڈھانچے مسمار کیے گئے جبکہ کروڑوں روپے مالیت کی تقریباً۶۰کنال جنگلاتی اراضی واگزار کرائی گئی۔
صحافیوں سے گفتگو کرتے ہوئے رانا نے کہا کہ وہ ابھی پیر پنچال علاقے سے واپس آئے ہیں اور انہوں نے محکمہ جنگلات کے کردار کی تحقیقات کا حکم دیا ہے۔انہوں نے کہا کہ متاثرہ افراد ہمارے معاشرے کا حصہ ہیں اور ان کی قربانیوں اور خدمات کی بدولت ہی جموں و کشمیر آج بھارت کے ساتھ کھڑا ہے۔ انہوں نے الزام لگایا کہ اس طرح کی کارروائیوں سے لوگوں کے جذبات مجروح کیے جا رہے ہیں۔
وزیر نے عوام سے پُرسکون رہنے اور تحمل کا مظاہرہ کرنے کی اپیل کرتے ہوئے یقین دلایا کہ کسی کے ساتھ ناانصافی نہیں ہوگی اور متاثرین کی باز آبادکاری کیلئے اقدامات کیے جائیں گے۔انہوں نے کہا کہ لوگوں کے نقصانات کا معاوضہ دیا جائے گا اور جو بھی نقصان کا ذمہ دار ہوگا، اس کے خلاف قانونی کارروائی عمل میں لائی جائے گی۔
رانا نے کہا کہ قبائلی امور کا محکمہ متاثرہ خاندانوں کی باز آبادکاری کیلئے اقدامات کرے گا۔انہوں نے اس واقعے کو افسوسناک قرار دیتے ہوئے کہا کہ اس طرح کی کارروائیوں کی کسی مہذب معاشرے میں کوئی جگہ نہیں۔انہوں نے مزید کہا کہ یہ لوگ گزشتہ پچاس برسوں سے یہاں آباد ہیں اور ان کے پاس موجود ریونیو ریکارڈ کے مطابق یہ زمین انہی کی ملکیت ہے۔
وزیر نے دعویٰ کیا کہ متعلقہ زمین ریونیو ریکارڈ میں درج ہے اور محکمہ جنگلات کے دائرہ اختیار میں نہیں آتی۔ (ایجنسیاں)
