جے پور، ،8 مئی (یواین آئی )آئی پی ایل 2026 کا میلہ اپنے دلچسپ مرحلے میں داخل ہو چکا ہے۔ ہفتے کے روز سوائی مان سنگھ اسٹیڈیم میں ایک اہم معرکہ ہونے جا رہا ہے جہاں راجستھان رائلز کا مقابلہ گجرات ٹائٹنز سے ہوگا۔ اس میچ میں سب کی نظریں 15 سالہ بیٹنگ سنسنی ویبھو سوریاونشی پر ہوں گی، جن کے کاندھوں پر راجستھان کی امیدوں کا بوجھ ہے۔
اس سیزن کی سب سے بڑی دریافت ویبھو سوریہ ونشی ثابت ہوئے ہیں۔ صرف 15 سال کی عمر میں انہوں نے 10 اننگز میں 404 رنز بنا کر کرکٹ کی دنیا کو حیران کر دیا ہے۔ ان کا 237.65 کا اسٹرائیک ریٹ ان کی جارحانہ بلے بازی کا ثبوت ہے۔ سن رائزرز حیدرآباد کے خلاف ان کی 37 گیندوں پر 103 رنز کی اننگز آج بھی شائقین کے ذہنوں میں تازہ ہے۔
دونوں ٹیمیں اس وقت پوائنٹس ٹیبل پر برابر کی سطح پر ہیں۔راجستھان رائلز کے 10 میچوں میں 12 پوائنٹس (بہتر نیٹ رن ریٹ)گجرات ٹائٹنز کے بھی 10 میچوں میں 12 پوائنٹس ہیں۔راجستھان کے لیے سب سے بڑی تشویش ان کا ہوم گراؤنڈ ہے۔ سیزن کا شاندار آغاز کرنے کے باوجود، راجستھان اپنے گھر (جے پور) میں گزشتہ دونوں میچ ہار چکا ہے۔ اب انہیں ٹاپ-2 میں جگہ پکی کرنے کے لیے یہاں جیتنا لازمی ہے۔
راجستھان رائلز کی بلے بازی میں سوریہ ونشی کو یشسوی جیسوال (300 رنز) اور وکٹ کیپر دھرو جریل کا بھرپور ساتھ مل رہا ہے۔ کپتان ریان پراگ بھی 90 رنز کی طوفانی اننگز کھیل کر فارم میں واپس آ چکے ہیں۔ بالنگ کی کمان انگلش اسپیڈ اسٹار جوفرا آرچر (15 وکٹیں) سنبھالے ہوئے ہیں، جبکہ ناندرے برگر، رویندر جڈیجہ اور روی بشنوئی مڈل اوورز میں توازن فراہم کر رہے ہیں۔
گجرات نے ابتدائی ناکامیوں کے بعد زبردست واپسی کی ہے اور گزشتہ 8 میں سے 6 میچ جیتے ہیں۔ کپتان شبھمن گل، سائی سدرشن اور تجربہ کار جوس بٹلر ٹیم کو مضبوط آغاز فراہم کر رہے ہیں۔ ان کی بالنگ لائن اپ ٹورنامنٹ کی خطرناک ترین لائن اپس میں سے ایک ہے، جس میں کگیسو ربادا (16 وکٹیں)، محمد سراج اور پرسدھ کرشنا شامل ہیں۔
اعداد و شمار کے لحاظ سے گجرات کا پلہ بھاری رہا ہے۔ دونوں کے درمیان ہوئے 9 میچوں میں سے 6 گجرات نے جیتے ہیں۔ تاہم، اس سیزن کے پچھلے مقابلے میں راجستھان نے 6 رنز سے کامیابی حاصل کی تھی۔ جے پور کی پچ اس سیزن میں رنز کا ڈھیر ثابت ہوئی ہے، جہاں پہلی اننگز کا اوسط اسکور 226 رہا ہے۔ شب و روز کے اس میچ میں ‘ٹاس ایک بار پھر فیصلہ کن کردار ادا کر سکتا ہے۔
