ایجنسیز
جموں؍۲۷مارچ
جموں و کشمیر حکومت نے جمعہ کے روز بتایا کہ گزشتہ تین برسوں کے دوران مرکز کے زیر انتظام علاقے میں آتشزدگی کےایک ہزار۸۷۶ واقعات پیش آئے ہیں اور متاثرین کو تقریباً۱۸کروڑ روپے کی مالی امداد فراہم کی گئی ہے۔
اسمبلی اجلاس کے دوران نیشنل کانفرنس کے رکن اسمبلی علی محمد ساگر کے سوال کے جواب میں وزیر اعلیٰ عمر عبداللہ نے کہا’’گزشتہ تین برسوں کے دوران جموں و کشمیر میں آتشزدگی کے کل ایک ہزار۸۷۶واقعات رپورٹ ہوئے ہیں‘‘۔
عمرعبداللہ، جو وزارتِ ڈیزاسٹر مینجمنٹ، ریلیف، بحالی اور تعمیرِ نو کے بھی انچارج ہیں، نے وضاحت کی کہ ریاستی ڈیزاسٹر رسپانس فنڈ(ایس ڈی آر ایف ) کے تحت مقررہ امدادی معیار کے مطابق آتشزدگی سے متاثرہ افراد کیلئے۱۷۹۹ء۰۹لاکھ روپے کی رقم مختص کی گئی ہے۔
وزیر اعلیٰ نے بتایا کہ یہ امداد اُن متاثرین کو فراہم کی گئی جن کی جائیداد یا مکانات تباہ ہوئے، اور یہ تمام ادائیگیاں مقررہ امدادی ضوابط کے مطابق کی گئیں۔
مزید برآں، انہوں نے واضح کیا کہ تسلیم شدہ قدرتی آفات، بشمول آتشزدگی، کے متاثرین کیلئے امدادی رقم۲۰۲۲سے۲۰۲۶کے عرصے کے لیے ایس ڈی آر ایف کے تحت طے شدہ یکساں قومی ضوابط کے مطابق ہی فراہم کی جاتی رہے گی۔
تعمیراتی لاگت میں اضافے کے پیش نظر معاوضے کی ناکافی ہونے سے متعلق خدشات کے جواب میں عبداللہ نے کہا کہ امدادی معیار میں کسی بھی قسم کی تبدیلی حکومتِ ہند کے دائرہ اختیار میں آتی ہے، کیونکہ موجودہ نظام پورے ملک میں یکساں طور پر نافذ ہے۔
