نامزدگی واپس لینے کا وقت ختم، تقریباً 2,200 امیدوار انتخابی میدان میں

نئی دہلی، 26 مارچ (یو این آئی) آسام، کیرالہ اور پڈوچیری میں اسمبلی انتخابات کے ساتھ ساتھ گوا، کرناٹک، ناگلینڈ اور تریپورہ میں ضمنی انتخابات کے لیے کاغذات نامزدگی واپس لینے کی آخری مہلت جمعرات کی سہ پہر تین بجے ختم ہوگئی۔
الیکشن کمیشن کے مطابق کاغذات نامزدگی کی جانچ پڑتال مکمل ہو چکی ہے اور اب تقریباً 2,200 امیدوار انتخابی میدان میں ہیں۔ انتخابی شیڈول کا اعلان 15 مارچ کو کیا گیا تھا، جس کے تحت پولنگ کا پہلا مرحلہ 9 اپریل کو مقرر ہے۔
سرکاری اعداد و شمار کے مطابق تین ریاستوں کی 296 اسمبلی نشستوں پر 2,140 امیدوار الیکشن لڑ رہے ہیں۔ آسام کی 126 نشستوں پر 789 امیدوار، کیرالہ کی 140 نشستوں پر 985 امیدوار اور پڈوچیری کی 30 نشستوں پر 366 امیدوار میدان میں ہیں۔ دوسری جانب، ضمنی انتخابات میں چار ریاستوں کے پانچ انتخابی حلقوں میں 66 امیدوار اپنی قسمت آزما رہے ہیں۔
الیکشن کمیشن نے پریس ریلیز میں کہا ہے کہ کاغذات نامزدگی کی جانچ ریٹرننگ افسران نے امیدواروں اور ان کے مجاز ایجنٹوں کی موجودگی میں کی اور شفافیت کو یقینی بنانے کے لیے پورے عمل کی ویڈیو گرافی کرائی گئی ہے۔ درست طور پر نامزد امیدواروں کی فہرست مع تصاویر نوٹس بورڈ پر چسپاں کر دی گئی ہے۔
نامزدگی کا عمل اس ماہ کے شروع میں شروع ہوا تھا، جس میں کاغذات داخل کرنے کی آخری تاریخ 23 مارچ طے کی گئی تھی۔ 24 مارچ کو جانچ پڑتال کے بعد نامزدگی واپسی کا وقت آج دوپہر 3 بجے ختم ہو گیا۔ اس عمل کی تکمیل کے ساتھ ہی اگلے ماہ ہونے والی پولنگ سے قبل انتخابی ریاستوں اور مرکز کے زیر انتظام علاقے پڈوچیری میں ووٹرز تک پہنچنے کے لیے سیاسی جماعتوں کے درمیان انتخابی مہم کا مرحلہ شروع ہو گیا ہے۔