نئی دہلی، 26 مارچ (یو این آئی) دہلی کی وزیر اعلیٰ ریکھا گپتا نے جمعرات کو شالیمار باغ اسمبلی حلقہ کے سرکاری اسکولوں میں اس سال دسویں جماعت میں داخلہ لینے والی 1100 طالبات میں سائیکلیں تقسیم کیں۔
اس دوران وزیر اعلیٰ نے بیٹیوں کو ‘دیوی سوروپا’ (دیوی کا روپ) قرار دیتے ہوئے انہیں سلام کیا اور کہا کہ نوراتری صرف پوجا کا نہیں، بلکہ بیٹیوں کے احترام اور ان کے بااختیار مستقبل کا عہد کرنے کا تہوار ہے۔ انہوں نے بتایا کہ حال ہی میں پیش کیے گئے دہلی بجٹ میں انہوں نے بیٹیوں، بہنوں اور خواتین کے لیے زیادہ سے زیادہ اسکیمیں شامل کرنے کی کوشش کی ہے تاکہ معاشرے کا یہ طبقہ بااختیار اور خود کفیل بن سکے۔ انہوں نے ‘لکھپتی بٹیا یوجنا’ کا ذکر کرتے ہوئے کہا کہ اب دہلی میں پیدا ہونے والی ہر بیٹی کے مستقبل کی معاشی بنیاد حکومت خود رکھے گی۔
محترمہ گپتا نے بتایا کہ بیٹی کی پیدائش سے لے کر پہلی، چھٹی، نویں، بارہویں جماعت اور پھر کالج کے ہر سال تک حکومت براہِ راست اس کے اکاؤنٹ میں مالی امداد جمع کرے گی۔ گریجویشن مکمل کرنے تک ہر بیٹی کو تقریباً 1.25 لاکھ روپے کی امداد ملے گی، جس سے وہ ‘لکھپتی بٹیا’ بن کر خود اعتمادی کے ساتھ زندگی میں آگے بڑھ سکے گی۔ وزیر اعلیٰ نے کہا کہ وہ چاہتی ہیں کہ دہلی کی ہر بیٹی نہ صرف اسکول بلکہ کالج تک پڑھے، اپنے پیروں پر کھڑی ہو اور اپنا مستقبل خود بنائے۔
وزیر اعلیٰ نے کہا کہ جب انہوں نے طالبات سے ان کے مسائل جاننے کی کوشش کی تو معلوم ہوا کہ اسکول آنے جانے میں دشواری کی وجہ سے کئی بار پڑھائی متاثر ہوتی ہے، یہاں تک کہ کچھ بچیوں کو اسکول چھوڑنا پڑتا ہے۔ اسی مسئلے کے حل کے لیے حکومت نے فیصلہ کیا ہے کہ ہر سال نویں جماعت میں آنے والی ہر طالبہ کو سائیکل دی جائے گی۔ اس سال تقریباً 1,30,000 طالبات اس سے مستفید ہوں گی۔ انہوں نے واضح کیا کہ جہاں نویں کی طالبات کو حکومت کی طرف سے سائیکل دی جائے گی، وہیں اس موقع پر دسویں جماعت میں پہنچنے والی طالبات کو انہوں نے ذاتی پہل کے تحت سائیکلیں تحفے میں دی ہیں۔
وزیر اعلیٰ نے کچھ سیاسی تبصروں پر سخت رخ اختیار کرتے ہوئے کہا کہ بیٹیوں کو سائیکل دینے جیسی اسکیم پر کیے گئے قابلِ اعتراض تبصرے انتہائی شرمناک ہیں۔ انہوں نے کہا کہ ہماری بیٹیاں دیوی ہیں، ان کے مستقبل کے لیے بنائی گئی اسکیم پر ایسی باتیں کرنا افسوسناک ہے۔ ایسی سوچ پر انہیں شرم آتی ہے۔ محترمہ گپتا نے یقین دلایا کہ دہلی حکومت ان کی حفاظت کی پوری ذمہ داری لیتی ہے اور ہر بیٹی کو آگے بڑھنے کا پورا موقع دیا جائے گا۔ انہوں نے کہا کہ بیٹیوں کو اتنا بڑا بننا ہے کہ والدین، معاشرہ اور ملک ان پر فخر کرے۔ انہیں پورا یقین ہے کہ دہلی کی ہر بیٹی اپنا مستقبل خود لکھے گی۔
خواتین کی معاشی آزادی کو فروغ دینے کے لیے وزیر اعلیٰ نے اعلان کیا کہ دہلی حکومت 1000 خواتین کو ان کے نام پر نئے آٹو پرمٹ دے گی۔ یہ ‘پنک آٹو’ خواتین کے ذریعے چلائے جائیں گے، جس سے انہیں باوقار روزگار اور خود انحصاری کا موقع ملے گا۔ صحت کے شعبے میں اہم پہل کا اعلان کرتے ہوئے وزیر اعلیٰ نے بتایا کہ دہلی میں پیدا ہونے والے ہر نومولود بچے کا 56 اقسام کے جینیاتی نقائص کی شناخت کرنے والا خصوصی بلڈ ٹیسٹ مفت کیا جائے گا۔ یہ مہنگا ٹیسٹ حکومت مکمل طور پر مفت کرائے گی تاکہ کسی بھی بیماری کا ابتدائی سطح پر پتہ چل سکے اور وقت پر علاج ممکن ہو۔
