سرینگر؍۲۶مارچ
وزارت داخلہ نے بدھ کو بتایا کہ۲۰۲۵کے دوران جموں و کشمیر میں۴۴۹۱کلوگرام منشیات برآمد کی گئیں۔
لوک سبھا میں شیام کمار دولت باڑوے کے ایک غیر ستارہ دار سوال کے جواب میں وزیر مملکت برائے داخلہ نتیانند رائے نے بتایا کہ نارکوٹکس کنٹرول بیورو کے مرتب کردہ اعداد و شمار کے مطابق جموں و کشمیر میں منشیات کی برآمدات۲۰۲۳میں۱۱ہزار۶۶کلوگرام‘۲۰۲۴میں۵۷۰۸ کلوگرام اور۲۰۲۵ میں۴۴۹۱ کلوگرام رہیں۔
حکومت نے ایوان کو بتایا کہ غیر ملکی عناصر منشیات کو سرحدوں کے پار پہنچا کر نارکو ٹیررزم میں معاونت کر رہے ہیں تاکہ جموں و کشمیر میں دہشت گردی کی سرگرمیوں کے لیے فنڈنگ کی جا سکے۔
اس نے مزید بتایا کہ۲۰۲۵میں بھارت پاکستان سرحد کے ساتھ۲۹۲ڈرون/غیر مسلح فضائی گاڑیاں ضبط یا برآمد کی گئیں، جو سرحد پار اسمگلنگ کے لیے ڈرون کے بڑھتے ہوئے استعمال کی نشاندہی کرتی ہیں۔
وزیر نے یہ بھی کہا کہ منشیات سے متعلق مقدمات میں مطلوب۶۶مفرور افراد کی نشاندہی کی گئی ہے۔ ان کے خلاف مجموعی طور پر۲۴ریڈ نوٹس اور۲۵ بلیو نوٹس جاری کیے گئے ہیں، جبکہ۲۰۲۵کے دوران پانچ مفرور افراد کو مختلف ممالک سے واپس بھیج دیا گیا۔
