ایجنسیز
سرینگر؍۱۳مارچ
نیشنل کانفرنس کے صدر فاروق عبداللہ نے جمعہ کے روز مغربی ایشیا میں جاری جنگ کے جلد خاتمے کی امید ظاہر کرتے ہوئے کہا کہ بھارت میں ایندھن کی کمی اسی تنازع کے باعث پیدا ہوئی ہے جس کی وجہ سے تیل کی اہم گزرگاہ آبنائے ہرمز بند ہو گئی ہے۔
حضرت بل درگاہ میں صحافیوں سے بات کرتے ہوئے انہوں نے کہا’’ایندھن اور گیس کی قلت اس جنگ کی وجہ سے ہے جو جاری ہے۔ ہم امید اور دعا کرتے ہیں کہ یہ جنگ جلد ختم ہو جائے‘‘۔
جموں و کشمیر کے سابق وزیر اعلیٰ جمعۃ الوداع کی نماز کی ادائیگی کے لیے مشہور درگاہ میں موجود تھے۔
فاروق عبداللہ نے کہا کہ کچھ طاقتیں اسلام کو تباہ کرنے کی کوشش کر رہی ہیں۔ انہوں نے کہا، ’’اللہ ان لوگوں کو تباہ کرے جو اسلام کو تباہ کرنا چاہتے ہیں‘‘۔
نیشنل کانفرنس کے صدر نے عوام سے اتحاد برقرار رکھنے کی اپیل کرتے ہوئے کہا’’ہم اسی وقت آگے بڑھ سکتے ہیں جب ہم ایک ساتھ رہیں۔‘‘
