ایجنسیز
سرینگر؍۱۳مارچ
ضلع ڈوڈہ کے بھدرواہ علاقے میں بستی گاؤں کے قریب پیش آئے ایک سڑک حادثے میں جموں و کشمیر پولیس کے ایک ہیڈ کانسٹیبل اور ان کی اہلیہ جاں بحق جبکہ ان کے دو بچے زخمی ہوگئے۔
حکام کے مطابق ایک آلٹو کار بستی گاؤں کے قریب بے قابو ہو کر دریا میں جا گری۔ اس حادثے میں جموں و کشمیر پولیس کے ہیڈ کانسٹیبل ذوالفقار علی اور ان کی اہلیہ کی موت ہوگئی، جبکہ ان کے دو بچے بھی زخمی ہوگئے۔ یہ اطلاع خبر رساں ایجنسی جی این ایس نے دی ہے۔
بتایا جاتا ہے کہ ہیڈ کانسٹیبل ڈیوٹی پر جا رہے تھے جب یہ حادثہ پیش آیا۔ زخمی بچوں کو علاج کے لیے قریبی اسپتال منتقل کیا گیا ہے۔
ادھر پولیس نے واقعے کا نوٹس لے کر مزید کارروائی شروع کر دی ہے۔
اسی دوران ڈپٹی کمشنر نے یہاں گورنمنٹ میڈیکل کالج کا دورہ کیا اور زخمیوں کی عیادت کرتے ہوئے ان کی خیریت دریافت کی۔
ہسپتال حکام نے ڈپٹی کمشنر کو زخمیوں کی حالت اور انہیں فراہم کیے جا رہے علاج کے بارے میں آگاہ کیا۔ انہوں نے چیف میڈیکل آفیسر اور ڈیوٹی پر تعینات ڈاکٹروں کو ہدایت دی کہ زخمیوں کو بہترین ممکنہ طبی علاج اور مناسب دیکھ بھال فراہم کی جائے۔
زخمیوں اور ان کے تیمارداروں سے بات چیت کرتے ہوئے ڈپٹی کمشنر نے ان کی جلد صحت یابی کے لیے نیک تمناؤں کا اظہار کیا اور ضلعی انتظامیہ کی جانب سے ہر ممکن تعاون کا یقین دلایا۔
