ایجنسیز
نئی دہلی؍۲۸فروری
ہندوستان نے ایران پر امریکہ اور اسرائیل کی مشترکہ فوجی کارروائی پر گہری تشویش ظاہر کرتے ہوئے تمام فریقوں سے ضبط و تحمل برتنے اور بات چیت کے ذریعے مسائل کے حل پر زور دیا ہے۔
وزارتِ خارجہ نے ہفتہ کو ایک بیان میں کہا کہ ہندوستان ایران اور خلیجی خطے میں تازہ واقعات پر انتہائی فکر مند ہے۔
وزارت نے کہا کہ ہندوستان کا مطالبہ ہے کہ تمام فریق ضبط و تحمل سے کام لیں، کشیدگی کم کریں اور عام شہریوں کی سلامتی کو ترجیح دیں۔ بیان میں کہا گیا ہے کہ مکالمے اور سفارت کاری کے ذریعے کشیدگی کم کر کے مسائل کا حل نکالا جانا چاہیے۔
متاثرہ ممالک میں مقیم ہندوستانی شہریوں کی سلامتی کے بارے میں وزارت نے کہا’’اس خطے میں ہمارے مشن ہندوستان شہریوں کے رابطے میں ہیں اور مشاورت جاری کر کے انہیں محتاط رہنے، مشن دفاتر سے رابطے میں رہنے اور مقامی سکیورٹی ہدایات پر عمل کرنے کو کہا گیا ہے‘‘۔
اس سے پہلے مغربی ایشیا کے سات ممالک ایران، اسرائیل، قطر، سعودی عرب، بحرین، اردن اور کویت میں ہندوستانی سفارت خانوں نے وہاں موجود ہندوستانی شہریوں کو انتہائی احتیاط برتنے کی ہدایت دی تھی اور ہنگامی حالات میں سفارت خانوں کے ایمرجنسی نمبروں اور ای میل پر رابطہ کرنے کو کہا تھا۔
ان میں سے کئی سفارت خانوں نے گزشتہ دنوں ایران، اسرائیل اور امریکہ کے درمیان بڑھتے تناؤ کو دیکھتے ہوئے ہندوستانی شہریوں کو ان ممالک سے نکل جانے کا مشورہ بھی دیا تھا۔
