بند سیاحتی مقامات کا معاملہ وزیر داخلہ کے ساتھ اٹھائوں گا:وزیرا علی

جموں: جموںکشمیر کے وزیر اعلیٰ عمر عبداللہ کا کہنا ہے کہ وہ مرکزی وزیر داخلہ امت شاہ کے ساتھ ان کے دورہ جموں و کشمیر کے دوران پہلگام دہشت گردانہ حملے کے بعد بند سیاحتی مقامات کو دوبارہ کھولنے کا معاملہ اٹھائیں گے۔
عمرعبداللہ نے کہا’’مجھے لگتا ہے کہ پہلگام واقعے کے بعد بند ان سیاحتی مقامات کو دوبارہ کھولنے کا وقت آگیا ہے‘‘۔
وزیر اعلیٰ نے ان باتوں کا اظہار جمعرات کو اسمبلی میں اپنے خطاب کے دوران کیا۔
عمرعبد نے کہا’’پہلگام واقعے کے بعد ابھی کئی سیاحتی مقامات بند ہیں، مجھے لگتا ہے کہ ان کے دوبارہ کھولنے کا وقت آگیا ہے،اس ضمن میں حکومت کی طرف سے مرکزی حکومت کے ساتھ بات چیت جاری ہے‘‘۔
ان کا خطاب میں کہناتھا’’میں اس ہائوس اور رکن اسمبلی بانڈی پورہ کو یہ یقین دلانا چاہتا ہوں کہ وزیر داخلہ جموں وکشمیر کا دورہ کر رہے ہیں، میں ان کے ساتھ ملاقات کے دوران یہ معاملہ اٹھائوں گا‘‘۔
عمر عبداللہ نے سیاحت کے شعبے میں رجسٹریشن کے موجودہ عمل پر بھی تشویش کا اظہار کیا اور اسے پرانا قرار دیا۔انہوں نے کہا کہ۱۹۷۸سے رجسٹریشن کے قواعد و ضوابط پر نظرثانی نہیں کی گئی اور حکومت ان میں اصلاحات کے لیے کام کر رہی ہے۔
واضح رہے کہ۲۲؍اپریل۲۰۲۵ کو پہلگام میں ہونے والے دہشت گردانہ حملے کے بعد، جس میں۲۶ شہری، جن میں زیادہ تر سیاح تھے، جاں بحق ہوئے تھے، حکام نے جموں و کشمیر کے کئی سیاحتی مقامات کو بند کرنے کا حکم دیا تھا۔ ان میں سے کچھ مقامات کو بعد میں مرحلہ وار دوبارہ کھول دیا گیا جبکہ کئی ہنوز بند ہیں۔