بالائی علاقوں بشمول سیاحتی مقامات پر تازہ برفباری

سرینگر: کشمیر کے بالائی علاقوں میں تازہ برفباری ریکارڈ کی گئی جس کے نتیجے میں درجہ حرارت میں معمولی بہتری دیکھنے کو ملی۔
محکمہ موسمیات کے مطابق کمزور مغربی ہواؤں کے زیر اثر وادی میں بدستور بادلوں کا سلسلہ جاری ہے اور آئندہ چند روز تک موسم میں مزید تبدیلیاں متوقع ہیں۔
محکمہ موسمیات کے ترجمان نے بتایا کہ گلمرگ، سونمرگ، دودھ پتھری، ٹنگمرگ، پہلگام، گریز، سادھناٹاپ،دبجن، ہرپورہ، پیر کی گلی اور دکسم‘سنتھن ٹاپ جیسے بالائی مقامات پر ہلکی برفباری ریکارڈ ہوئی۔سری نگر سمیت وادی کے دیگر میدانی علاقوں میں منگل اور بدھ کی درمیانی شب تک وقفے وقفے سے بارشوں کا سلسلہ جاری رہا۔
محکمہ موسمیات کے مطابق وادی میں۶فروری کی شام تک جزوی ابر آلود موسم رہے گا۔۷فروری کو بالائی علاقوں میں ہلکی برفباری کے امکانات ظاہر کیے گئے ہیں جبکہ۸فروری کو موسم عموماً خشک رہنے کا امکان ہے۔۹اور۱۰فروری کو کہیں کہیں ہلکی بارش یا برفباری ہوسکتی ہے۔
حکام نے پہاڑی اور برفانی علاقوں میں رہنے والوں کو احتیاط برتنے اور برفانی تودوں سے محفوظ رہنے کی ہدایت جاری کی ہے۔ ساتھ ہی مسافروں اور ٹرانسپورٹروں کو مشورہ دیا گیا ہے کہ کسی بھی سفر سے پہلے شاہراہوں اور رابطہ سڑکوں کی صورتحال لازمی طور پر چیک کریں کیونکہ کسی بھی وقت برفباری یا بارش سفر میں رکاوٹ پیدا کر سکتی ہے۔
اس دوران محکمہ موسمیات کی پیش گوئی کے عین مطابق وادی کشمیر میں موسم میں بتدریج بہتری واقع ہو رہی ہے اور وادی میں۱۵فرری تک موسم میں کسی بڑی تبدیلی کا کوئی امکان نہیں ہے۔
متعلقہ محکمے کے ایک ترجمان نے بتایا کہ وادی میں۴سے۶فروری کی شام موسم عام طور پر خشک رہنے کا امکان ہے تاہم اس دوران۶فروری کی شام کو پہاڑی علاقوں میں کہیں کہیں ہلکی برف باری ہوسکتی ہے۔انہوں نے کہا کہ۷؍اور۸فروری کی شام تک موسم مجموعی طور پر خشک رہنے کا امکان ہے۔
ان کا کہنا ہے کہ بعد میں۹؍ اور۱۰ فروری کو کئی مقامات پر ہلکی برف باری یا بارشوں کا امکان ہے۔ ترجمان نے بتایا کہ وادی میں۱۱فروری کو موسم عام طور پر خشک رہنے کا امکان ہے تاہم اس دوران پہاڑی علاقوں میں کہیں کہیں ہلکی برف باری کو خارج از امکان قرار نہیں دیا جاسکتا ہے۔انہوں نے کہا کہ بعد میں۱۲سے۱۵فروری تک موسم عام طور پر خشک رہنے کا امکان ہے۔
محکمے نے اپنی ایڈوائزری میں ٹرانسپورٹروں اور مسافروں سے کہا ہے کہ وہ سڑکوں اور شاہراہوں کی تازہ صورتحال معلوم کرنے کے لئے متعلقہ ٹریفک یونٹوں کی طرف رجور کریں اور انتظامیہ کی ایڈوائزری پر عمل کریں۔
پہاڑی علاقوں کے لوگوں سے کہا گیا ہے کہ وہ ان علاقوں میں جانے سے گریز کریں جہاں برفانی تودے رہنے کے خطرات رہتے ہیں۔
دریں اثنا وادی کے بیشتر علاقوں میں شبانہ درجہ حرارت۱سے۴ڈگری سینٹی گریڈ تک معمول سے زیادہ ریکارڈ ہوا ہے جبکہ صوبہ جموں کے بیشتر علاقوں میں شبانہ درجہ حرارت۰سے۲ڈگری سینٹی گریڈ تک معمول سے زیادہ ریکارڈ ہوا ہے۔
وادی میں مشہور سیاحتی مقام گلمرگ سرد ترین علاقہ رہا ہے جہاں کم سے کم درجہ حرارت منفی 8.0 ڈگری سینٹی گریڈ ریکارڈ ہوا ہے جبکہ صوبہ جموں میں بھدرواہ سرد ترین جگہ رہی ہے جہاں شبانہ درجہ حرارت منفی2.0 ڈگری سینٹی گریڈ ریکارڈ ہوا ہے۔