’مرکزی حکومت کی شروع کی گئی ریفارم ایکسپریس نے اسٹارٹ اَپس کے لیے ایک سازگار ماحول پیدا کیا ہے‘
نئی دہلی: وزیرِاعظم نریندر مودی نے جمعہ کے روز نیشنل اسٹارٹ اپ ڈے کے موقع پر ہندستان کی اسٹارٹ اپ برادری کو مبارکباد پیش کی۔ اس موقع پر اسٹارٹ اپ انڈیا اقدام کے آغاز کو دس برس مکمل ہو گئے ہیں۔
ایکس پر ایک پوسٹ میں وزیرِاعظم نے کہا کہ یہ دن ہندستانی عوام، بالخصوص نوجوانوں کی’جرأت، اختراعی جذبے اور کاروباری جوش‘کو منانے کا موقع ہے ، جن کے بارے میں انہوں نے کہا کہ وہ عالمی اسٹارٹ اپ ماحولیاتی نظام میں ہندستان کے عروج کا باعث بن رہے ہیں۔
وزیرِاعظم نےکہا’’اپنے پختہ عزم اور لگن کے ساتھ ہمارے نوجوان دوست اسٹارٹ اپس کی دنیا میں مسلسل نئے ریکارڈ قائم کر رہے ہیں۔ان کا جوش اور جذبہ ایک ترقی یافتہ ہندستان کے خواب کو شرمندئہ تعبیر کرنے کی سب سے بڑی قوت بنے گا۔‘‘
مودی نے ثابت قدمی کی اہمیت اجاگر کرتے ہوئے ایک سنسکرت شلوک کا بھی حوالہ دیا اور کہا کہ مسلسل محنت سے مشکل ترین کام بھی انجام دیا جا سکتا ہے ۔
گزشتہ ایک دہائی کے دوران ہندستان دنیا کے سب سے بڑے اسٹارٹ اپ ایکو سسٹمز میں سے ایک بن کر ابھرا ہے ، جہاں دسمبر۲۰۲۵تک دو لاکھ سے زائد اسٹارٹ اپس قائم ہو چکے ہیں۔
اس دوران اسٹارٹ اپ انڈیا کے فلیگ شپ پروگرام کی تکمیل کے دس برس کے موقع پر منعقدہ ایک بڑے پروگرام سے خطاب کرتے ہوئے وزیر اعظم نریندر مودی نے کہا کہ۲۰۱۴میں محض چار اسٹارٹ اپس سے شروع ہونے والا یہ ماحولیاتی نظام آج بڑھ کر۱۲۵سے زائد فعال یونیکورن کمپنیوں تک پہنچ چکا ہے۔
وزیرِ اعظم نے کہا کہ یہ دن اُن لوگوں خصوصاً نوجوانوں کے حوصلے ، اختراعی سوچ اور کاروباری جذبے کا جشن منانے کا موقع ہے ، جنہوں نے عالمی اسٹارٹ اَپ ماحولیاتی نظام میں ہندستان کے عروج کو توانائی بخشی ہے ۔
اسٹارٹ اَپس کے انقلابی کردار پر زور دیتے ہوئےمودی نے کہا’’اسٹارٹ اَپس تبدیلی کے محرک ہیں جو ہماری معیشت اور معاشرے کے مستقبل کو نئی شکل دے رہے ہیں۔ یہ ہمارے سیارے کو درپیش چیلنجز سے نمٹنے میں غیر معمولی کام کر رہے ہیں اور ساتھ ہی لوگوں کے لیے نئے مواقع پیدا کر رہے ہیں۔ مجھے اُن تمام افراد پر فخر ہے جنہوں نے بڑے خواب دیکھنے کی ہمت کی، روایتی حدود کو چیلنج کیا، خطرات کاسامنا کیا اور اپنے اسٹارٹ اَپس کے ذریعے بامعنی اور انقلابی اثرات مرتب کیے ‘‘۔
وزیرِ اعظم نے مزید کہا کہ ہندستانی حکومت تمام متعلقہ فریقین کے ساتھ مل کر اسٹارٹ اَپ ماحولیاتی نظام کو مضبوط بنانے کے تئیں مسلسل کام کر رہی ہے ۔ انہوں نے اس بات پر زور دیا کہ ہندستان کی جانب سے شروع کی گئی ریفارم ایکسپریس نے اسٹارٹ اَپس کے لیے ایک سازگار ماحول پیدا کیا ہے ، جس کے نتیجے میں وہ اب خلاءاور دفاع جیسے اُن شعبوں میں بھی قدم رکھ پا رہے ہیں جنہیں کبھی ناقابلِ تصور خیال کیا جاتا تھا۔ انہوں نے اس بات پر فخر کا اظہار کیا کہ اسٹارٹ اَپس آتم نربھر کی تعمیر میں کلیدی کردار ادا کر رہے ہیں اور حکومت اس عزم کا اعادہ کرتی ہے کہ وہ خطرات مول لینے اور مسائل کا حل تلاش کرنے والے نوجوانوں کی بھرپور حمایت جاری رکھے گی۔
مودی نے سرپرست، انکیوبیٹرز، سرمایہ کار، تعلیمی ادارے اور دیگر شراکت دار سمیت اسٹارٹ اَپس کے وسیع تر ماحولیاتی نظام کے کردار کو بھی سراہا۔ وزیراعظم نے کہا کہ ان کی رہنمائی اور بصیرت نوجوان اختراع کاروں کی حوصلہ افزائی میں نہایت معاون ثابت ہوگی ہے اور ہندستان کی ترقی کی داستان میں اہم کردار ادا کرے گی۔
وزیرِ اعظم نے اختراع، استقامت اور قومی ترقی کے محرک کے طور پر ہندستان کے اسٹارٹ اَپس پر اپنے بھرپور اعتماد کابھی اعادہ کیا۔
ایک سنسکرت شلوک کا حوالہ دیتے ہوئے مودی نے ہندستانی نوجوان کاروباریوں کے عزم و استقلال اور لگن کی ستائش کی اور کہا کہ ان کی انتھک کوششیں اسٹارٹ اَپ کی دنیا میں نئے ریکارڈ قائم کر رہی ہیں۔ وزیراعظم نے زور دیا کہ ان کی توانائی اور جذبہ ہی وکست بھارت کے خواب کو حقیقت میں بدلنے کی سب سے بڑی طاقت ثابت ہوگا۔
