’ایران سے کشمیری طلبہ کی کمرشل پروازوں کے ذریعے واپسی‘

سرینگر: ایران میں بدامنی کے پیش نظر بھارتی طلبہ وطن واپس لوٹ رہے ہیں، جن میں اکثریت کا تعلق کشمیر سے ہے۔
جموں و کشمیر اسٹوڈنٹس ایسوسی ایشن  کے قومی کنوینر ناصر خوہامی نے ایک مقامی خبر رساں ایجنسی کو بتایا کہ واپس آنے والے بھارتی طلبہ، جن کی بڑی تعداد کشمیر سے ہے، اس وقت شیراز ایئرپورٹ پر موجود ہیں۔ وہ ایئر عربیہ کی ایک پرواز کے ذریعے شیراز انٹرنیشنل ایئرپورٹ سے شارجہ انٹرنیشنل ایئرپورٹ جا رہے ہیں، جہاں سے وہ ایئر عربیہ کی ہی کنیکٹنگ پروازکے ذریعے دہلی کے اندرا گاندھی انٹرنیشنل  ایئرپورٹ پہنچیں گے۔ یہ پرواز دہلی میں رات۲:۴۰بجے لینڈ کرنے کی متوقع ہے۔
خوہامی نے مزید بتایا کہ ماہان ایئر کی ایک پرواز بھی تہران انٹرنیشنل ایئرپورٹ سے آپریٹ ہو رہی ہے، جو دہلی کے آئی جی آئی ایئرپورٹ پر رات۱۲:۱۰ بجے پہنچنے کی توقع ہے۔
خوہامی نے کہا کہ تمام طلبہ اپنے ذاتی خرچ پر سفر کر رہے ہیں اور ان دونوں پروازوں میں بڑی تعداد میں زائرین بھی سوار ہیں۔
تہران میں بھارتی سفارت خانے کے حکام کے مطابق حکومتِ ہند کی باضابطہ انخلا کارروائیاں فی الحال معطل ہیں۔انہوں نے کہا’’سفارت خانہ طلبہ کے ساتھ براہِ راست رابطے میں ہے اور اگر انخلا ضروری ہوا تو انہیں سرکاری ذرائع سے ذاتی طور پر آگاہ کیا جائے گا‘‘۔
اس سے قبل دن کے اوائل میں تل ابیب میں بھارتی سفارت خانے نے ایک تازہ ایڈوائزری جاری کی، جس میں اسرائیل میں مقیم تمام بھارتی شہریوں سے انتہائی احتیاط برتنے اور مقامی حکام کی جانب سے جاری کردہ حفاظتی ہدایات پر سختی سے عمل کرنے کی اپیل کی گئی۔
اس ایڈوائزری میں کہا گیا ہے’’خطے میں موجودہ صورتحال کے پیش نظر، اسرائیل میں مقیم تمام بھارتی شہریوں کو مشورہ دیا جاتا ہے کہ وہ چوکنا رہیں اور اسرائیلی حکام اور ہوم فرنٹ کمانڈ کی جانب سے جاری کردہ حفاظتی رہنما اصولوں اور پروٹوکولز پر سختی سے عمل کریں‘‘۔
ایڈوائزری میں شہریوں کو مزید معلومات کے لیے ہوم فرنٹ کمانڈ کی سرکاری ویب سائٹ سے رجوع کرنے کی ہدایت دی گئی ہے اور اسرائیل کے لیے تمام غیر ضروری سفر سے گریز کرنے کا مشورہ بھی دیا گیا ہے۔