وجے ہزارے ٹرافی: شاردول ٹھاکر زخمی، شریاس ائیر ممبئی ٹیم کے نئے کپتان مقرر

ممبئی 5 جنوری(یو این آئی ) ممبئی کرکٹ ایسوسی ایشن نے اسٹار بلے باز شریاس ائیر کو وجے ہزارے ٹرافی کے بقیہ لیگ میچوں کے لیے ممبئی کی سینئر مینز ٹیم کا کپتان مقرر کر دیا ہے۔ وہ زخمیفاسٹ بولر شاردول ٹھاکر کی جگہ یہ ذمہ داری سنبھالیں گے۔شریاس ائیر کی کپتانی اور ٹیم میں شمولیت ان کی فٹنس سے مشروط ہے۔ یاد رہے کہ آئیر گزشتہ اکتوبر میں آسٹریلیا کے خلاف سڈنی ون ڈے میں کیچ لینے کی کوشش کے دوران زخمی ہو گئے تھے اور تقریباً تین ماہ بعد وہ مسابقتی کرکٹ میں واپسی کر رہے ہیں۔ائیر کو 11 جنوری سے شروع ہونے والی نیوزی لینڈ کے خلاف تین ون ڈے میچوں کی سیریز کے لیے ہندوستانی ٹیم میں شامل کیا گیا ہے، تاہم ان کی شرکت بی سی سی آئی کے ‘سینٹر آف ایکسی لینس سے ملنے والے فٹنس کلیئرنس پر منحصر ہے۔
اگر آئیر کو انٹرنیشنل کرکٹ کے لیے فٹ قرار دے دیا جاتا ہے، تو وہ ہندوستانی ٹیم جوائن کر لیں گے اور ممبئی ایسوسی ایشن کو ٹورنامنٹ کے ناک آؤٹ مرحلے کے لیے نیا کپتان چننا ہوگا۔ایم سی اے کے سیکریٹری انمیش خانولکر کا کہنا ہے کہ آئیر ہماچل پردیش اور پنجاب کے خلاف شیڈول بقیہ دو لیگ میچوں میں ٹیم کی قیادت کریں گے۔ ممبئی اس وقت گروپ سی میں دوسرے نمبر پر ہے اور اگلے مرحلے (ناک آؤٹ) میں پہنچنے کے لیے مضبوط پوزیشن میں ہے۔