نہیں صاحب ان کی کوئی خطا نہیں ہے…… بالکل بھی نہیں ہے۔یہ نادان بھی نہیں ہیں ‘ انہیں خبر ہے کہ یہ کیا کررہے ہیں اور کیا نہیں ……اور سب سے زیادہ اہم یہ ہے کہ انہیں خبر ہے کہ یہ ایسا کیوں کررہے ہیں …… کیوں یہ نئے سال کے استقبال میں آسمان سر پر اٹھا رہے ہیں ،جشن منا رہے ہیں ،خوش ہو رہے ہیں ، پارٹی کررہے ہیں ،ناچ رہے ہیں ،گا رہے ہیں ……اور کچھ اس انداز میں ،اس جوش و جذبے کے ساتھ کہ …… کہ جیسے ان کے ہاتھ الہ دین کا کوئی چراغ لگ گیا ہے جو ان کے سارے کے سارے مسائل حل کر دے گا ……یہ جانتے ہیں کہ ایسا کچھ نہیں ہیں،انہیں جن مشکلا ت، جن مسائل کا سامنا ہے، جن سے یہ نبرد آزما ہیں وہ سارے مسائل اور مشکلات وہیں کے وہیں ہیں……اٹل ہیں ، اپنی جگہ پر قائم و دائم ہیں ……ہل نہیں رہے ہیں ، ضدی ہیں ……اس کے باوجود بھی لوگ ……عام لوگ دیوانہ وار کی طرح نئے سال کی آمد کی خوشیاں منا رہے ہیں اور……اور اس لئے منا رہے ہیں کہ اللہ میاں کی قسم یہ جو دنیا ہے ،جس میںہم جی رہے ہیں اس دنیا میں جینا اتنا مشکل ہو گیا ہے……اتنا سخت ہو گیا ہے کہ ……کہ لوگ ہنسنا بھول گئے ہیں……مسکرانا بھول گئے ہیں،وہ بھیڑ میں بھی تنہا ہو تے ہیں ،اپنے گھروں میں بھی اپنے اہل و عیال کے ساتھ ہو نے کے باوجو دبھی وہ اکیلے ہو تے ہیں ……مسائل و مشکلات میں اس قدر گھرے ہو ئے ہوتے ہیں کہ ان سے باہر نکل ہی نہیں پا رہے ہیں……ایک مسئلہ ابھی حل نہیں ہو ا ہو تا ہے کہ دوسرا سر ابھارتا ہے……ایک مشکل ابھی ختم نہیں ہو تی ہے کہ دوسری دستک دیتی ہے ……اور گھس جاتی ہے، ہماری زندگیوں میں گھس جاتی ہے اور ہمارے سکون کو تہہ و بالا کردیتی ہے ۔ہنسی خوشی کا کوئی بہانہ بھی مسیر نہیں ہو پاتا ہے……لوگ اس کیلئے ترستے رہتے ہیں……اور ایسے میں نئے سال کی آمد اگر انہیں کچھ دیر، کچھ لمحوں کیلئے اپنے ان مشکلات اور مسائل کو سائڈ میں رکھ کر……ایک طرف کرکے ،خود کو بھلانے کا ایک موقع فراہم کرتی ہے تو……تو ایسا ہی سہی ۔ منانے دیجئے انہیں جشن کہ جب جشن منانے کے بعد یہ تھک کر سو جاتے ہیں اور اگلی صبح…… نئے سال کی پہلی صبح یہ جاگ جاتے ہیں تو…… تو انہیں گڈ مارننگ کہنے کیلئے نئے سال کی خوشیاں نہیں بلکہ ان کے دیرینہ ساتھی…… دیریہ مسائل و مشکلات ہی سامنے آتے ہیں……اور بڑی بے شرمی سے اسے واپس اس کی اصلی دنیا میں لاتے ہیں،زمین پر ٹپک دیتے ہیں ۔ ہے نا؟
