تین برسوں میں سی اے پی ایف میں۴۳۸ خودکشیاں

حکومت نے منگل کے روز پارلیمنٹ کو بتایا کہ گزشتہ تین برسوں کے دوران سنٹرل آرمڈ پولیس فورسز (سی اے پی ایف)‘ آسام رائفلز اور نیشنل سکیورٹی گارڈ (این ایس جی) کے اہلکاروں میں۴۳۸ خودکشی کے واقعات اور سات فریٹر سائیڈ (ساتھی اہلکاروں کے ہاتھوں ہلاکت) کے واقعات رپورٹ ہوئے ہیں۔
لوک سبھا میں ایک سوال کے تحریری جواب میں وزیر مملکت برائے امورِ داخلہ نتیانند رائے نے بتایا کہ خودکشی کے واقعات کی تعداد میں کمی آئی ہے۔
ان کے مطابق ۲۰۲۳ میں۱۵۷خودکشیاں رپورٹ ہوئیں، جو ۲۰۲۵ میں کم ہو کر ۱۳۳ رہ گئیں۔ فریٹر سائیڈ کے واقعات میں ۲۰۲۳ میں دو۲۰۲۴ میں ایک جبکہ ۲۰۲۵ میں چار واقعات درج کئے گئے۔
فورس وار اعداد و شمار کے مطابق تین برسوں کے دوران سنٹرل ریزرو پولیس فورس (سی آر پی ایف) میں سب سے زیادہ ۱۵۹ خودکشیوں کے واقعات رپورٹ ہوئے۔ اس کے بعد بارڈر سیکیورٹی فورس (بی ایس ایف) میں۱۲۰؍ اور سنٹرل انڈسٹریل سیکیورٹی فورس (سی آئی ایس ایف) میں ۶۰ خودکشیوں کے واقعات سامنے آئے۔
استعفوں سے متعلق معلومات دیتے ہوئے وزیر مملکت نے کہا کہ ۲۰۱۴سے۲۰۲۵ کے درمیان  سی اے پی ایف اور آسام رائفلز کے مجموعی طور پر۲۳ہزار۳۶۰؍ اہلکاروں نے ملازمت سے استعفیٰ دیا۔
ان میں سب سے زیادہ استعفے بارڈر سکیورٹی فورس (بی ایس ایف) میں سامنے آئے، جہاں۷ہزار۴۹۳؍اہلکاروں نے سروس چھوڑ دی۔ اس کے بعد سی آر پی ایف میں۷ہزار۴۵۶؍ اور سی آئی ایس ایف میں۴ہزار۱۳۷؍ اہلکاروں کے استعفے درج کئے گئے۔
اعداد و شمار کے مطابق ۲۰۲۵میں اب تک ۳۰۷۷؍اہلکاروں نے استعفیٰ دیا ہے، جن میں بی ایس ایف میں سب سے زیادہ ۱۱۵۷؍ استعفے شامل ہیں۔
سروس کنڈیشنز سے متعلق سوالات کے جواب میں وزیر مملکت نے کہا کہ سی اے پی ایف اہلکار عموماً آٹھ گھنٹے کی شفٹ میں کام کرتے ہیں، تاہم ڈیوٹی کے اوقات آپریشنل ضروریات کے مطابق بدل سکتے ہیں۔ انہوں نے کہا کہ بٹالین ڈھانچے میں آرام، چھٹی اور تربیت کی گنجائش رکھی گئی ہے۔
مرکزی وزیر نے بتایا کہ حکومت نے فیلڈ میں تعینات سی اے پی ایف اہلکاروں کیلئے سالانہ ۷۵ دن کی چھٹی کا انتظام کیا ہے، جس میں ۶۰ دن کی ارنڈ لیو اور ۱۵دن کی کیڑول لیو شامل ہیں، اور کوشش کی جا رہی ہے کہ اہلکار زیادہ سے زیادہ اپنی مجاز چھٹیوں سے فائدہ اٹھا سکیں۔
وزیر مملکت نے یہ بھی کہا کہ اہلکاروں کی ذہنی صحت کے تحفظ کیلئے سی اے پی ایف، کمپوزٹ اور یونٹ ہسپتالوں میں سہولیات فراہم کی جا رہی ہیں، جن میں خصوصی نفسیاتی خدمات بھی شامل ہیں۔
اس کے علاوہ فورسز کی جانب سے باقاعدگی سے آگاہی پروگرام، اسٹریس مینجمنٹ ورکشاپس، یوگا اور مراقبہ سیشنز منعقد کئے جاتے ہیں تاکہ اہلکاروں کی ذہنی فلاح و بہبود کو فروغ دیا جا سکے۔