’مل کر ہمیں بھارت کو ایک ترقی یافتہ ملک بنانے کیلئے آگے بڑھنا ہوگ’

وجے دیوس کے موقع پر لیفٹیننٹ گورنر منوج سنہا نے آج اکھنور کے علاقے کچریال میں۱۰۸ فٹ بلند ہائی ماسٹ قومی پرچم کی نقاب کشائی کی۔
اس موقع پر لیفٹیننٹ گورنر نے۱۹۷۱ کی جنگ میں اپنی جرأت و قربانی سے ملک کا سر فخر سے بلند کرنے والے شہداء ، فوجی جوانوں اور افسران کو خراجِ عقیدت پیش کیا۔ انہوں نے جنگی سابق فوجیوں اور ویر ناریوں کو بھی اعزاز سے نوازا اور قوم کیلئے ان کی جرأت و قربانی کو سلام پیش کیا۔
لیفٹیننٹ گورنر نے کہا’’کچریال کی سرزمین نہ صرف تاریخی اہمیت رکھتی ہے بلکہ یہ ملک کے باشندوں کیلئے ایک مقدس مقام بھی ہے، کیونکہ اس زمین کا ہر انچ ان بہادر سپاہیوں کو شکرگزاری کے ساتھ یاد کرتا ہے جنہوں نے۱۹۶۵؍اور۱۹۷۱ کی جنگوں میں ملک کی خودمختاری اور سالمیت کی حفاظت کرتے ہوئے اپنی جانوں کا نذرانہ پیش کیا۔’’
لیفٹیننٹ گورنر نے وائٹ نائٹ کور (۱۶ویں کور) کے جنرل آفیسر کمانڈنگ، لیفٹیننٹ جنرل پی کے مشرا کو ۱۰۸ فٹ بلند ہائی ماسٹ قومی پرچم نصب کرنے کے اس بامعنی اقدام پر مبارکباد پیش کی۔ انہوں نے فلیگ فاؤنڈیشن آف انڈیا کی بھی اس تاریخی اقدام میں نمایاں خدمات کو سراہا۔
سنہا نے کہا’’ہمارا محبوب اور فاتح ترنگا دنیا میں ہمیشہ بلند و بالا لہراتا رہے۔ ہمارا ترنگا ہماری آزادی، خودداری، قربانیوں اور شہادتوں کی علامت ہے۔ آئیے ہم سب مل کر بھارت کو ایک ترقی یافتہ ملک بنانے کے بلند وڑن کی تکمیل کیلئے قدم سے قدم ملا کر آگے بڑھیں‘‘۔
اس موقع پر ستیش شرما (وزیر برائے یوتھ سروسز اینڈ اسپورٹس، خوراک، شہری سپلائیز و امورِ صارفین، ٹرانسپورٹ، سائنس و ٹیکنالوجی، انفارمیشن ٹیکنالوجی، اے آر آئی و ٹریننگز)،لیفٹیننٹ جنرل پرتیک شرما (جی او سی اِن چیف، ناردرن کمانڈ)،لیفٹیننٹ جنرل پی کے مشرا (جی او سی، وائٹ نائٹ کور)،میجر جنرل ایچ ایس برار (جی او سی، ۱۰ ریپڈ)،بریگیڈیئر دیانند شرما (کمانڈر، پلن والا بریگیڈ)،میجر جنرل آشِم کوہلی (ریٹائرڈ)، چیف ایگزیکٹو آفیسر، فلیگ فاؤنڈیشن آف انڈیا،سینئر سرکاری افسران، جنگی سابق فوجی، ویر ناریاں اور طلبہ بھی موجود تھے