مسافروں سے انڈیگو کا اظہار معذرت، 15 دسمبر تک ٹکٹ کی منسوخی پر مکمل رقم واپسی کی پیشکش

نئی دہلی، 5 دسمبر (یو این آئی) نجی ایئر لائن انڈیگو نے بڑی تعداد میں پروازوں کی منسوخی سے متاثر ہونے والوں اور ہوائی اڈوں پر پھنسے ہوئے مسافروں سے معذرت کا اظہار کیا ہے ، اور 15 دسمبر تک ٹکٹوں کی منسوخی پر مکمل رقم کی واپسی کا وعدہ کیا ہے ۔
ایئر لائن نے جمعہ کے روز سوشل میڈیا پلیٹ فارم ایکس پر ایک پوسٹ میں مسافروں سے معذرت کرتے ہوئے کہا کہ 5 اور 15 دسمبر کے درمیان سفر کا ٹکٹ کینسل کرنے پر مکمل رقم کی واپسی دی جائے گی۔ ادائیگیاں اسی اکاؤنٹ میں موصول ہوں گی جس سے ادائیگی کی گئی تھی۔ سفر کی تاریخوں اور اوقات میں تبدیلی کے لیے کوئی چارج نہیں ہوگا۔
اس میں مزید کہا گیا کہ ہوائی اڈوں پر پھنسے ہوئے مسافروں کے لیے کھانے پینے کے انتظامات کیے گئے ہیں، اور بزرگ شہریوں کے لیے ویٹنگ لاؤنج بنائے گئے ہیں۔
واضح رہے کہ جمعہ کے روز ملک بھر میں انڈیگو کی سینکڑوں پروازیں منسوخ کر دی گئی تھیں۔ صرف دہلی ہوائی اڈے پر کل 225 پروازیں (135 روانگی اور 90 آمد) منسوخ کی گئیں۔ اس سے ملک بھر کے ہزاروں مسافروں کو پریشانی کا سامنا کرنا پڑا۔ اس سے قبل جمعرات کے روز ملک بھر میں تقریباً 400 پروازیں منسوخ کر دی گئی تھیں۔
انڈیگو نے کہا ہے کہ وہ جلد از جلد پروازوں کے معمول کو بحال کرنے کے لیے کام کر رہی ہے اور اس سلسلے میں مسافروں سے تعاون کی درخواست کی ہے ۔