اسلام آباد دھماکے کے بعد پی سی بی نے ون ڈے اور ٹی-20 سہ فریقی سیریز راولپنڈی منتقل کردی

اسلام آباد/نئی دہلی، 13 نومبر (یو این آئی) پاکستان کرکٹ بورڈ (پی سی بی) نے سری لنکا کے خلاف جاری ون ڈے سیریز اور سری لنکا و زمبابوے کے ساتھ آئندہ سہ فریقی ٹی-20 سیریز کے ترمیم شدہ شیڈول کا جمعرات کے روز اعلان کیا۔ اسلام آباد میں ہوئے خودکش حملے کے پیشِ نظر تمام میچوں کو راولپنڈی منتقل کردیا گیا ہے۔
یہ سیریز پہلے لاہور میں کھیلی جانی تھی، لیکن کھلاڑیوں کی سیکیورٹی خدشات کے باعث ٹورنامنٹ کو راولپنڈی کرکٹ اسٹیڈیم منتقل کردیا گیا ہے۔
پاکستانی اخبار ’ڈان‘ کے مطابق نئے پروگرام کے تحت پاکستان اور سری لنکا کے درمیان دوسرا اور تیسرا ایک روزہ بین الاقوامی میچ اب 14 اور 16 نومبر کو راولپنڈی میں کھیلا جائے گا۔
پاکستان، سری لنکا اور زمبابوے کے درمیان سہ فریقی ٹی-20 سیریز اب 18 نومبر سے شروع ہوگی، جس کا فائنل 29 نومبر کو اسی مقام پر ہوگا۔
پی سی بی نے کہا کہ پروگرام میں ترمیم کا فیصلہ سری لنکا کرکٹ (ایس ایل سی) اور زمبابوے کرکٹ کے ساتھ مشاورت کے بعد کیا گیا ہے تاکہ ’’آپریشنل اور میچ سے متعلق ضروریات پوری کی جا سکیں۔‘‘
پی سی بی کے مطابق، ’’پی سی بی کو توقع ہے کہ سہ فریقی سیریز آئی سی سی ٹی-20 ورلڈ کپ 2026 سے قبل ایک اہم تیاری پلیٹ فارم ثابت ہوگی۔‘‘
بورڈ نے مزید کہا کہ ون ڈے سیریز اور ٹی-20 ٹورنامنٹ دونوں کے لیے تازہ ترین شیڈول جلد ہی پی سی بی کے سرکاری پلیٹ فارم پر جاری کیا جائے گا۔
پی سی بی کے چیف آپریٹنگ آفیسر سمیع احمد، اسلام آباد کے چیف کمشنر، انسپکٹر جنرل پولیس اور دونوں ٹیموں کے منیجرز نے انتظامات پر ہونے والی بریفنگ میں شرکت کی۔ ہائی کمشنر نے دھماکے پر افسوس کا اظہار کیا اور سیکیورٹی منصوبے پر اطمینان ظاہر کیا۔