جی ایس ٹی شرح میں اضافے کے سبب کیرالہ میں لاٹری شعبے کو بڑا جھٹکا

ترواننت پورم، 14 اکتوبر (یو این آئی) مرکزی حکومت کی جانب سے نئی جی ایس ٹی شرح نافذ کرنے سے کیرالہ کے لاٹری شعبے کو سخت جھٹکا لگا ہے ، کیونکہ لاٹری ٹکٹوں پر ٹیکس کو 28 فیصد سے بڑھا کر 40 فیصد کر دیا گیا ہے ۔
نتیجتاً ریاستی حکومت کو فی ٹکٹ 3.35 روپے کا ریونیو نقصان ہوگا، جو لاٹری کی ہر قرعہ اندازی کے اعتبار سے تقریباً 3.35 کروڑ روپے بنتا ہے ۔ حکومت نے آپریٹنگ مارجن، رعایت اور ایجنسی کمیشن میں کمی کرکے ٹکٹ کی قیمتوں میں اضافہ نہیں ہونے دیا۔ اس وقت کل ٹکٹ فروخت کی آمدنی کا 60 فیصد انعامی رقم کے طور پر تقسیم کیا جاتا ہے ۔
وزیر اعلیٰ نے کہا کہ "مرکزی وزارت خزانہ اور جی ایس ٹی کونسل کوِ، ذاتی طور پر اور خطوط کے ذریعے بار بار لاٹری ٹکٹوں پر ٹیکس کی شرح نہ بڑھانے کی درخواست کے باوجود، مرکز نے مکمل طور پر لاپروائی برتی ہے ، جس کی وجہ سے اس شعبے پر ٹیکس کا بوجھ بہت زیادہ بڑھ گیا ہے ۔
ریاستی حکومت لاٹری کا کاروبار کرکے روزی کمانے والے لوگوں کو محفوظ رکھنے کی مسلسل کوشش کرتی رہی ہے ، اور اس نے ٹکٹ کی قیمتیں نہ بڑھانے کا فیصلہ کیا ہے ، چاہے اس سے آمدنی میں کمی ہی کیوں نہ ہو، جی ایس ٹی کو 28 فیصد سے بڑھا کر 40 فیصد کیے جانے کے باوجود، ٹکٹ کی قیمت 50 روپے ہی رہے گی۔
تاہم وزیر اعلیٰ نے تسلیم کیا کہ فروخت میں کچھ کمی ہوئی ہے ، جس کے نتیجے میں کل انعامی رقم میں معمولی کمی آئی ہے ، حکومت ایجنٹ رعایت اور کمیشن کے ڈھانچے میں ممکنہ ساختیاتی تبدیلیوں کا جائزہ لے رہی ہے ۔
انہوں نے یقین دلایا کہ حکومت یہ یقینی بنانے کے لیے تمام ضروری اقدامات کرے گی کہ مرکز کی جانب سے عائد جی ایس ٹی ترمیم سے لاٹری کارکنوں اور ان کے کنبے پر منفی اثر نہ پڑے ۔