سرینگر/یکم اکتوبر
پلوامہ سے تعلق رکھنے والا ایک ۶۲ سالہ شخص، جو اگست میں پانتھہ چوک میں پیش آئے سڑک حادثے میں شدید زخمی ہوا تھا، منگل کی شام سرینگر کے ایس ایم ایچ ایس اسپتال میں زخموں کی تاب نہ لا سکا۔
متوفی کی شناخت الطاف احمد پنڈت ولد عبدالغنی پنڈت ساکن وتھور پلوامہ کے طور پر ہوئی ہے۔ پولیس اور اسپتال ذرائع کے مطابق ۳۱؍ اگست کو یہ حادثہ اس وقت پیش آیا جب الطاف احمد کی موٹر سائیکل ایک ٹرک سے ٹکرا گئی، جس کے نتیجے میں انہیں شدید چوٹیں آئیں۔
حادثے کے فوراً بعد ٹرک ڈرائیور عبد الحمید بٹ ساکن کھنموہ نے زخمی کو ایس ایم ایچ ایس اسپتال پہنچایا۔
ایک ماہ تک علاج جاری رہنے کے باوجود ڈاکٹرز نے منگل کی شام تصدیق کی کہ الطاف احمد پنڈت زخموں کی تاب نہ لاتے ہوئے دم توڑ بیٹھے۔
پولیس نے واقعے کا نوٹس لیتے ہوئے مزید تحقیقات شروع کر دی ہے۔
کشمیر میں سڑک حادثات ایک مستقل تشویش کا باعث ہیں۔ ماہرین اس بات پر زور دیتے ہیں کہ حادثات پر قابو پانے کے لیے ٹریفک قوانین کی سختی سے پابندی، روڈ سیفٹی سے متعلق بہتر آگاہی اور حادثہ خیز مقامات کی باقاعدہ نگرانی لازمی ہے۔ایجنسیز
