ادھم پور میں فوجی جوان گولی لگنے سے ہلاک

جموں/۲۳ستمبر
جموں کشمیر کے ادھم پور ضلع میں منگل کو ایک فوجی جوان پراسرار طورپر گولی لگنے سے ہلاک ہوگیا۔
پولیس نے واقعے کی تحقیقات شروع کر دی ہیں تاکہ یہ معلوم کیا جا سکے کہ یہ حادثاتی فائرنگ تھی یا خودکشی کا واقعہ۔
معلوم ہوا ہے کہ فوجی ڈرائیور پارک کی گئی گاڑی میں بیٹھا ہوا تھا کہ اچانک گولی چلنے کی آواز سنائی دی۔واقعے کے فوری بعد اس کے ساتھی جائے وقوعہ پر پہنچے اور اسے خون میں لت پت پایا۔ جوان کو فوری طور پر اسپتال منتقل کیا گیا، جہاں ڈاکٹروں نے اسے مردہ قرار دیا۔
ادھرپولیس اور فوج کے حکام واقعے کی چھان بین میں مصروف ہیں اور ابتدائی معلومات کے مطابق گولی کا نشانہ لگنے کے حالات کا تعین کرنے کیلئے تمام پہلوؤں کا جائزہ لیا جا رہا ہے ۔یو این آئی