ہندوستان نے عمان کو 21 رن سے شکست دی

ابو ظہبی، 20ستمبر (یو این آئی) سنجو سیمسن (56) اور ابھیشیک شرما (38) کی شاندار اننگز کے بعد ہندوستان نے گیندبازوں کی بدولت ایشیا کپ کے 12ویں مقابلے میں عمان کو 21 رن شکست دے دی۔
ہندوستان کی جانب سے ہرشت رانا ، کلدیپ ، ارشدیپ، ہاردک پانڈیا کو ایک ایک وکٹ ملی۔
ہندوستانی ٹیم نے عمان کے خلاف ایشیا کپ 2025 کے آخری لیگ مقابلے میں پہلے بلے بازی کرتے ہوئے 20 اوور میں 8 وکٹوں کے نقصان پر 188 رن بنائے تھے۔ ہدف کے تعاقب میں اتری عمان کی ٹیم کی شروعات تو اچھی رہی لیکن ٹیم سست رفتار سے آگے بڑھتے رہی ۔سلامی بلے بازوں جتندر سنگھ اور عامر کلیم نے 4 اوور میں بغیر کوئی وکٹ گنوائے 27 رن بنائے۔ بلے بازوں نے عمان کو پاورپلے تک کوئی نقصان نہیں ہونے دیا اور چھ اوور میں ٹیم کے لئے 44 رن جوڑے۔
عمان کے سلامی بلے بازوں نے شاندار بلے بازی کا مظاہرہ کرتے ہوئے 7 ویں اوور میں اپنی 50 رن کی شراکت داری مکمل کی۔
طہندوستان کو آٹھویں اوور میں کامیابی ملی لیکن عمان کے کپتان جتندر ری ویو لے کر آوٹ ہونے سے بچ گئے ۔ لیکن وہ زیادہ دیر تک وکٹ پر ٹک نہیں سکے اور ہندوستان نے 9 ویں اوور میں انہیں اپنا شکار بنا لیا۔ جتندر سنگھ 33 گیندوں پر 32 رن بناکر کلدیپ یادو کی گیند پر آوٹ ہوگئے۔
عمان نے دس اوور میں ایک وکٹ کے نقصان پر 62 رن بنائے ۔ ٹیم کو اب دس اوور میں جیت کے لئے 127 رن درکار تھے۔ کریز پر عامر کلیم اور حماد مرزا محتاط انداز میں ٹیم کے لئے رن جوڑنا شروع کیا لیکن رن جوڑنے کی رفتار سست ہونے کی وجہ سے کم گیندوں میں زیادہ رن بنانے کا دباؤ بڑھتا چلا گیا۔ 14ویں اوور میں عمانی نے 100 رنز کا ہندسہ عبور کیا۔ ہاردک پانڈیا کی پانچویں گیند پر عامر کلیم نے چوکا لگا کر اسکور کو 100 تک پہنچا کر کچھ تیزی دکھائی۔
ہندوستان کے گیندباز عمان کا وکٹ حاصل کرنے کے لئے جدوجہد کرتے ہوئے نظرآئے لیکن عمان نے سنبھل کر کھیلنا جاری رکھا اور 15ویں اوور میں عامر کلیم نے اپنی نصف سنچری مکمل کر لی۔ انہوں نے 38 گیندوں پر نصف سنچری مکمل کی۔ یہ عامر کی ٹی-20 انٹرنیشنل میں دوسری نصف سنچری ہے۔ اسی اوور میں انہوں نے حماد مرزا کے ساتھ نصف سنچری کی شراکت داری بھی قائم کی۔
ہندوستان کو 18 ویں اوور میں دوسری کامیابی اس وقت ملی جب شاندار انداز میں بلے بازی کررہے عامر کلیم 46 گیندوں پر 64 رنز بنا کر پویلین واپس لوٹ گئے۔ انہوں نے اپنی اننگز میں سات چوکے اور دو چھکے مارے۔ ہرشِت رانا کی گیند پر ہاردک پانڈیا نے کلیم کا شاندار کیچ پکڑ کر ہندوستان کو اہم وکٹ دلائی۔
حماد مرزا 19 ویں اوور میں ہاردک پانڈیا کا شکار بنے ۔ انہوں نے 33 گیندوں میں پانچ چوکوں اور دو چھکوں کی مدد سے 51 رن کی شاندار اننگ کھیلی لیکن یہ اننگز جیت کے لئے ناکافی تھی۔
اس سے قبل ہندوستان نے ٹاس جیت کر پہلے بلے بازی کا فیصلہ کیا۔ بلے بازی کرنے اتری ٹیم انڈیا کی شروعات اچھی نہیں رہی اور اس نے دوسرے ہی اوور میں شبھمن گل (پانچ) کا وکٹ گنوا دیا۔ اس کے بعد بلے بازی کرنے آئے سنجو سیمسن نے ابھیشیک شرما کے ساتھ اننگز کو سنبھالا۔ دونوں بلے بازوں کے درمیان دوسرے وکٹ کے لیے 66 رنز کی شراکت ہوئی۔ آٹھویں اوور میں جیتن رامانندی نے ابھیشیک شرما کو آؤٹ کر اس شراکت کا خاتمہ کیا۔ ابھیشیک شرما نے 15 گیندوں پر پانچ چوکے اور دو چھکے لگاتے ہوئے 38 رنز بنائے۔اس کے بعد ہاردک پانڈیا (1) رن آؤٹ ہوئے۔ 12ویں اوور میں اکشر پٹیل 13 گیندوں پر 26 رنز بنا کر عامر کلیم کا شکار بنے۔ شِوَم دوبے (پانچ) بھی عامر کا شکار ہوئے۔ 18ویں اوور میں شاہ فیصل نے سنجو سیمسن کو آؤٹ کیا۔ سنجو سیمسن نے 45 گیندوں پر تین چوکے اور تین چھکے لگاتے ہوئے 56 رنز کی اننگز کھیلی۔ تِلَک ورما نے 18 گیندوں پر 29 رنز بنائے۔ آٹھویں وکٹ کے طور پر اَرشدِیپ سنگھ (1) رن آؤٹ ہوئے۔ ہندوستان نے مقررہ 20 اوورز میں آٹھ وکٹ پر 188 رنز کا اسکور کھڑا کیا۔ ہرشِت رانا آٹھ گیندوں پر 13 رنز بنا کر ناٹ آؤٹ رہے۔