سریش رینا نے رنجی ٹرافی کے لیے اتر پردیش کی 4 ٹیمیں بنانے کی وکالت کی

جونپور، 15 اکتوبر (یو این آئی) ہندوستانی کرکٹ ٹیم کے سابق کھلاڑی سریش رینا نے رنجی ٹرافی کے لیے اتر پردیش کی 4 ٹیمیں بنانے کی وکالت کی ہے۔
ویر بہادر سنگھ پوروانچل یونیورسٹی میں منعقدہ جونپور پریمیئر لیگ (جی پی ایل) کے فائنل مقابلے سے پہلے صحافیوں سے بات چیت کرتے ہوئے رینا نے رنجی ٹرافی میں اتر پردیش کی شرکت سے متعلق سوال پر ریاست میں 4 ٹیمیں بنانے کی ضرورت بتائی۔ ان کے مطابق، اس سے زیادہ کھلاڑیوں کو اپنی صلاحیت کا مظاہرہ کرنے کا موقع ملے گا اور ریاست کے کرکٹ کھلاڑیوں کو آگے بڑھنے کے لیے بہتر پلیٹ فارم مل سکے گا۔
انہوں نے کہا کہ پوروانچل سمیت پورے اتر پردیش میں باصلاحیت کھلاڑیوں کی کوئی کمی نہیں ہے۔ ضرورت اس بات کی ہے کہ انہیں بہتر تربیت دی جائے، ان کی صلاحیتوں کو نکھارا جائے اور قومی سطح تک پہنچایا جائے۔ انہوں نے کہا کہ اتر پردیش میں کرکٹ کے بے پناہ امکانات ہیں۔ کھلاڑیوں کو آگے بڑھنے کے لیے بہتر مواقع اور مناسب پلیٹ فارم فراہم کرنا ضروری ہے۔
اپنے کرکٹ کریئر کے ایک یادگار لمحے کا ذکر کرتے ہوئے رائنا نے کہا کہ موقع ملنے پر وہ اپنی اس اننگز کو دوبارہ کھیلنا چاہیں گے، جس میں وہ 87 رن کے اسکور پر رن آؤٹ ہو گئے تھے۔ ان کے اس بیان نے کرکٹ کے شائقین کو ان کی یادگار اننگز اور اس نامکمل اننگز کی یاد دلا دی۔
ہندوستانی کرکٹ ٹیم کے سابق کھلاڑی سریش ینا کی موجودگی نے کھلاڑیوں کا جوش بڑھا دیا۔ اپنے پسندیدہ کرکٹر کو قریب سے دیکھ کر کھلاڑیوں میں خاصا جوش نظر آیا۔ اس دوران میدان میں کرکٹ کے جوش و خروش کے ساتھ عہدیداروں اور کھلاڑیوں کا جوش بھی دیکھنے کو ملا۔
میچ شروع ہونے سے پہلے سریش رائنا نے گیند بازی کی۔ ان کی گیند پر یونیورسٹی کے وائس چانسلر پروفیسر راکیش سنگھ اور ضلع مجسٹریٹ سیموئل پال این نے بلے سے شاٹ لگائے۔ دونوں عہدیداروں کے شاٹ لگاتے ہی میدان تالیوں کی گونج سے بھر گیا۔ اس دوران کھلاڑیوں اور تماشائیوں میں خاصا جوش و خروش دیکھنے کو ملا۔