آئی جی بردی کا کشمیر کی سیکورٹی ‘ امن و قانون کی صورتحال کا جائزہ

سرینگر/۱۶ستمبر
انسپکٹر جنرل آف پولیس کشمیر زون، وی کے بردی (آئی پی ایس) نے منگل کو پولیس کنٹرول روم (پی سی آر) سری نگر میں ایک اہم اجلاس کی صدارت کی، جس میں وادی بھر کی مجموعی سیکورٹی اور امن و قانون کی صورتحال کا جائزہ لیا گیا۔
اجلاس میں رینج ڈی آئی جیز، تمام اضلاع کے ایس ایس پیز اور دیگر سینئر افسران نے شرکت کی۔ اس دوران افسران نے اپنے اپنے علاقوں کی تازہ صورتحال سے متعلق بریفنگ دی۔
آئی جی کشمیر نے افسران کو ہدایت دی کہ منشیات اور دہشت گردی سے متعلق کیسوں کی تفتیش کو مزید مضبوط بنایا جائے تاکہ عدالتوں میں سزا کی شرح میں اضافہ ہو۔ انہوں نے کیسوں کی کامیاب پیروی کے لیے مؤثر فالو اپ نظام قائم کرنے پر بھی زور دیا۔
انسپکٹر جنرل آف پولیس نے کہا کہ حساس علاقوں میں رات کے وقت گشت کو بڑھایا جائے ، مشکوک عناصر پر کڑی نظر رکھی جائے اور غیر قانونی سرگرمیوں کو روکنے کے لیے مارکیٹ چیکنگ مزید سخت کی جائے ۔
بردی نے واضح کیا کہ جموں و کشمیر پولیس عوام کے جان و مال کے تحفظ کے لیے پرعزم ہے اور امن و امان کو ہر حال میں قائم رکھا جائے گا۔ انہوں نے افسران پر زور دیا کہ وہ شفافیت، جواب دہی اور کیسوں کے بروقت تصفیے کو یقینی بنائیں تاکہ عوام کے حقوق کا بھرپور تحفظ ہو سکے ۔