ایل جی نے دہلی جانے والی پار سل ٹرین کوہری جھنڈی دِکھائی

کشمیر ویلی فروٹ گروئورس کم ڈیلرز یونین کے ایک وفد کی ایل جی سے ملاقات
سرینگر/۱۵؍ ستمبر
لیفٹیننٹ گورنر منوج سِنہا نے بڈگام سے آدرش نگر نئی دہلی کیلئے پہلی وقف شدہ پارسل ٹرین کوہری جھنڈی دِکھا کر روانہ کیا۔
سنہا نے وادی کے سیب کاشت کاروں او رتاجروں کیلئے تجارت اور کاروبار کے ایک نئے دور کی شروعات کرنے کیلئے وزیر اعظم نریندرمودی کا شکریہ اَدا کیا۔
لیفٹیننٹ گورنرنے کہا’’یہ سروس ٹرانزٹ ٹائم کو کافی حد تک کم کرے گی، ہزاروں کسانوں کیلئے آمدنی کے مواقع میں اِضافہ کرے گی اور خطے کی زرعی معیشت کو فروغ دے گی۔‘‘
سنہانے بھارتی ریلوے کو بڈگام سے نئی دہلی کے درمیان وقف مال بردار ریل سروس شروع کرنے پر مُبارک باد دی۔
لیفٹیننٹ گورنر نے مزید کہا’’یہ نئی سروس سیب کاشت کاروں کے لئے اَپنی پیداوار کو ملک کے مختلف حصوں تک پہنچانے کے لئے ایک بڑا قدم ہے۔ اِس سے مارکیٹ تک رَسائی مضبوط ہوگی اور کسانوں کی زِندگی اور معاش میں بہتری آئے گی۔‘‘
ایل جی نے کہا کہ قومی شاہراہوں پرآواجاہی میں رُکاوٹیں، ٹپوگرافی اور شدید بارشوں کی وجہ سے پھلوں کے کاشت کاروں کو نقصان ہوتا ہے۔آج سے شروع ہونے والی یہ مال بردارٹرین سروس ہر روز سیب اور دیگر جلدخراب ہونے والی اشیأ کی ٹرانسپورٹیشن کرے گی۔
پارسل ٹرین سروس (جوائنٹ پارسل پروڈکٹ۔ریپڈ کارگو سروس) روزانہ چلے گی اور تمام قسم کے پارسل سامان کے لئے موزوں ہے۔ آٹھ پارسل وین کوچوں پر مشتمل اس ٹرین کی مجموعی وزن اُٹھانے کی صلاحیت تقریباً ۱۸۰ ٹن (ہر کوچ میں۲۳ ٹن) ہے۔ مکمل پارسل وینوں کی بکنگ آن لائن موڈ میںدستیاب ہے جبکہ چھوٹے سامان کی بکنگ آف لائن کی جا سکتی ہے۔ یہ مال بردار ٹرین بڈگام سے صبح۱۵:۶پر روانہ ہوگی، جموں کے بڑی براہمنا سٹیشن پر سہ پہر ۳ بجے سے شام ۳۰:۴بجے تک رُکے گی اور اگلے دن صبح۳۰:۵ بجے آدرش نگر نئی دہلی پہنچے گی۔
اس دوران کشمیر ویلی فروٹ گروئورس کم ڈیلرز یونین کے ایک وفد نے اس کے چیئرمین بشیر احمد بشیر کی قیادت میں آج لیفٹیننٹ گورنر منوج سِنہاسے ملاقات کی۔
وفد کے اراکین نے بڈگام سے آدرش نگر نئی دہلی تک نئی پارسل ٹرین شروع کرنے کے لئے وزیر اعظم نریندر مودی اور لیفٹیننٹ گورنر منوج سِنہا کا شکریہ اَدا کیا۔ اُنہوں نے وادی کے پھل اُگانے والوں اور تاجروں کے مختلف فلاحی مسائل بھی اُٹھائے جن میں نیشنل ہائی وے۴۴پر پھلوں سے لدے ٹرکوں کی آسان آواجاہی اور مغل روڈ پر ۱۰ٹائروں والے ٹرکوں کی آمد و رفت شامل ہے۔
لیفٹیننٹ گورنر نے وفد کو یقین دِلایا کہ پھلوں کے کاشت کاروں اور تاجروں کے مسائل کو حل کرنے کے لئے مناسب کاررِوائی کی جائے گی۔ اُنہوں نے کہا کہ نیشنل ہائی وے کی مکمل بحالی کے لئے اَفرادی قوت اور مشینری تعینات کی گئی ہے اور پھلوں سے لدے رُکے ہوئے ٹرکوں کو ترجیحی بنیادوں پر روانہ کیا جائے گا۔ ا‘نہوں نے مزید یقین دِلایا کہ وادی کے مختلف علاقوں میں پھلوں کے کاشت کاروں اور تاجروں کی سہولیت کے لئے ریلوے فریٹ ٹرمینل قائم کئے جائیں گے۔
میٹنگ میں لیفٹیننٹ کے پرنسپل سیکرٹری ڈاکٹر مندیپ کے بھنڈاری بھی موجود تھے۔