وزیر اعظم مودی مسلح افواج کے اعلیٰ کمانڈروں کی کانفرنس سے خطاب کریں گے

وزیر اعظم نریندر مودی آپریشن سندور کے بعد پہلی بار مسلح افواج کے اعلیٰ کمانڈروں کی کانفرنس سے خطاب کریں گے اور قومی سلامتی سے متعلق امور پر حکومت کا نقطۂ نظر فوج کے ساتھ شیئر کریں گے ۔
یہ کانفرنس۱۵سے۱۷ستمبر تک کولکاتا میں منعقد ہوگی۔
یہ پہلا موقع ہے کہ یہ اہم کانفرنس کولکاتا میں منعقد کی جا رہی ہے ۔ بدلتی ہوئی عالمی جغرافیائی سیاسی صورتحال اور دنیا کے مختلف حصوں میں جاری تنازعات کے پیش نظر آپریشن سندور کے پس منظر میں ہونے والی یہ کانفرنس انتہائی اہم سمجھی جا رہی ہے ۔
اس کانفرنس میں مستقبل کے چیلنجوں اور ان سے نمٹنے کی تیاریوں پر خاص طور پر غور کیا جائے گا۔
کانفرنس میں وزیر اعظم کو تینوں افواج کے انضمام سے متعلق بڑے اصلاحاتی منصوبے تھیٹر کمان کی تشکیل پر ایک پریزنٹیشن دی جا سکتی ہے ۔ اس کے علاوہ انہیں دفاعی شعبے میں ‘میک ان انڈیا’ اسکیم کی موجودہ صورت حال، دیسی ہتھیاروں کے نظام اور پلیٹ فارمز کے بارے میں بھی معلومات فراہم کی جائیں گی۔
آپریشن سندور کے دوران استعمال کیے گئے دیسی ہتھیاروں کے بارے میں بھی علیحدہ طور پر ایک پریزنٹیشن تیار کی جا رہی ہے ۔
اس سال کی کانفرنس کا موضوع ہے ’اصلاحات کا سال مستقبل کیلئے تبدیلی‘۔وزیر اعظم نریندر مودی کانفرنس کا افتتاح کریں گے ، جبکہ وزیر دفاع راج ناتھ سنگھ، قومی سلامتی مشیر اجیت ڈوبھال، وزیر مملکت برائے دفاع سنجے سیٹھ، چیف آف ڈیفنس اسٹاف جنرل انیل چوہان اور دفاعی سکریٹری راجیش کمار سنگھ بھی اس کانفرنس میں شرکت کریں گے ۔ تینوں افواج کے سربراہان اور مشترکہ دفاعی اسٹاف کے افسران کے ساتھ ساتھ دیگر وزارتوں کے سکریٹریز کی شرکت بھی متوقع ہے ۔
یہ کانفرنس اصلاحات، تبدیلی اور آپریشنل تیاریوں پر مرکوز ہوگی۔ اس دوران مسلح افواج کے مختلف افسران اور جوانوں کے ساتھ بات چیت کے سیشن بھی منعقد کیے جائیں گے ۔
یہ کانفرنس مسلح افواج کے لیے غور و فکر اور پالیسی سازی کا سب سے اعلیٰ فورم ہے ، جہاں ملک کی اعلیٰ سول اور فوجی قیادت نظریاتی و حکمت عملی کی سطح پر خیالات کا تبادلہ کرتی ہے ۔