بی ایس ایف نے چناب دریا میں پھنسے۴۴لوگوں کو بچایا

جموں/۳ستمبر
بارڈر سکیورٹی فورس(بی ایس ایف) جموں فرنٹیئر نے آج اکھنور کے گرکھل علاقے میں چناب ندی میں پھنسے ۴۴لوگوں کو بچایا۔
بی ایس ایف کے رابطہ عامہ کے افسر نے یہاں بتایا کہ تیز اور دشوار ریسکیو آپریشن میں۴۴لوگوں کو بی ایس ایف کے ہیلی کاپٹر کے ذریعے جموں کی اکھنور تحصیل کے گرکھل کے نزدیک واقع گاؤں فاتو کوٹلی میں کامیابی سے بچایا گیا۔
افسر نے کہا ’’یہ آپریشن منفی حالات میں بھی سیلاب میں پھنسے ہوئے دیہاتیوں کی حفاظت کو یقینی بنانے کے لیے انجام دیا گیا‘‘ـ۔ انہوں نے مزید کہا کہ بی ایس ایف کی بروقت کارروائی سے متاثرہ خاندانوں کو راحت ملی اور ساتھ ہی جانی نقصان کو بھی روکا گیا۔
افسر نے مزید کہا’’بی ایس ایف نہ صرف ملک کی سرحدوں کی حفاظت کرتی ہے بلکہ ہنگامی حالات کے دوران شہریوں کی مدد کرنے کے بھی اپنے مشن میں ثابت قدم ہے ‘‘۔
بی ایس ایف افسرنے کہا کہ سرحدی محافظ دستہ بحران کے وقت ہر شہری کی حفاظت اور سلامتی کو یقینی بنانے کے اپنے عزم کو برقرار رکھے ہوئے ہے ۔