جعلی شادی ریکیٹ کا پردہ فاش

جموں پولیس نے چوکھی چورہ، اکھنور میں جعلی شادی ریکیٹ کا پردہ فاش کرتے ہوئے پانچ افراد کو گرفتار کرنے کا دعویٰ کیا ہے جن میں ایک خاتون بھی شامل ہے جو دلہن کا کردار نبھا رہی تھی۔
پولیس کے مطابق۱۱؍اگست کو پولیس اسٹیشن اکھنور میں ایف آئی آر نمبر۲۰۲۵/۱۴۰درج کی گئی جس میں شکایت کنندہ نے الزام لگایا تھا کہ اس سے جعلی شادی کے نام پر تین لاکھ روپے کا چونا لگایا گیا۔
شکایت گزار کے مطابق دیپک کمار ولد بلدیو راج ساکن دھنہ چھپری، چوکھی چورہ نے شکایت کنندہ رشبعل چند ولد چترو رام ساکن ڈوری ڈاگر کو بیرون یوٹی سے شادی کا رشتہ پیش کرکے پیسوں کا مطالبہ کیا اور بعد ازاں شادی کے محض دو دن بعد دلہن اپنے ساتھیوں کے ساتھ فرار ہوگئی۔
تحقیقات میں انکشاف ہوا کہ یہ گینگ شادی بیورو کے نام پر دھوکہ دہی کا نیٹ ورک چلا رہا تھا، جس میں دلہن، پجاری اور تمام رسوم کا انتظام شامل ہوتا تھا۔ شادی کے بعد دلہن مختلف بہانوں سے شوہر کو چھوڑ دیتی تھی۔ سماجی بدنامی کے خوف سے زیادہ تر متاثرین شکایت درج نہیں کراتے تھے ، تاہم بروقت رپورٹنگ کی وجہ سے پولیس کو بڑی کامیابی ملی۔
گرفتار شدگان کی شناخت دیپک کمار ولد بلدیو راج ساکن دھنہ چھپری، وکاس کمار ولد نیتار پرکاش ساکن پونچھ، ارون کمار ولد راج کمار ساکن بہار، استخار ولد سلیم ساکن اترپردیش اور کسوم لتا ساکن اترپردیش (دلہن) کے طور پر ہوئی ہے ۔
پولیس کے مطابق مزید گرفتاریاں خارج از امکان نہیں ہیں جبکہ اس نوعیت کے چار مزید کیسز، دو اکھنور اور دو نگروٹہ میں سامنے آئے ہیں جن کی تفتیش جاری ہے ۔
ایس پی رورل جموں اور ایس ایس پی جموں اس پورے کیس کی نگرانی کر رہے ہیں۔ پولیس نے عوام سے اپیل کی ہے کہ وہ اس طرح کی دھوکہ دہی سے ہوشیار رہیں اور کسی بھی مشتبہ سرگرمی کی فوراً اطلاع قریبی پولیس اسٹیشن کو دیں