سرینگر//
سرینگر کے صورہ علاقے میں آج ایک بار پھر غیر معیاری اور سڑا گلا گوشت برآمد ہونے سے مقامی آبادی میں شدید تشویش کی لہر دوڑ گئی۔
عینی شاہدین کے مطابق، اندازاً پانچ سو سے ایک ہزار کلوگرام تک سڑا ہوا گوشت نامعلوم افراد نے شاہراہ پر پھینک دیا تھا، جس کی بدبو سے پورا علاقہ متاثر ہوا۔
اطلاع ملتے ہی پولیس اور میونسپل کمیٹی کی ٹیمیں فوری طور پر جائے موقع پر پہنچیں۔ حکام نے تمام گوشت کو ضبط کر کے حفظانِ صحت کے اصولوں کے تحت تلف کر دیا۔
مقامی لوگوں نے اس واقعے کو عوامی صحت کے لیے سنگین خطرہ قرار دیتے ہوئے مطالبہ کیا ہے کہ اس گھناؤنے عمل میں ملوث عناصر کو فوری گرفتار کر کے سخت سے سخت سزا دی جائے ۔
حکام کا کہنا ہے کہ اس معاملے کی تحقیقات شروع کر دی گئی ہیں اور کسی کو بھی بخشا نہیں جائے گا۔
اس دوران فوڈ سیفٹی ڈیپارٹمنٹ نے ہفتے کو جموں کے گومٹ روڈ واقع مچھلی مارکیٹ میں اچانک معائنہ کیا، جس کے دوران ایک ہزارکلو گرام غیر معیاری اور غیر صحت بخش مچھلی ضبط کر لی گئی۔ محکمے کے مطابق یہ مچھلیاں حفظانِ صحت کے اصولوں کے منافی پائی گئی، جسے فوری طور پر تلف کرنے کا عمل جاری ہے ۔
اس کارروائی کے دوران محکمہ لیگل میٹرولوجی کی ٹیمیں بھی موجود رہیں اور مارکیٹ میں فروخت ہونے والی اشیاء کے معیار اور وزن کی جانچ پڑتال کی۔ حکام کا کہنا ہے کہ عوامی صحت سے کھیلنے والوں کے خلاف سخت کارروائی جاری رہے گی۔
ذرائع نے بتایا کہ مچھلیوں کو ضائع کرنے کے ساتھ ساتھ دکاندار پر ایک لاکھ روپے کا جرمانہ بھی عائد کیا گیا ہے ۔
