سرینگر//
سرینگر کے دشنامی اکھاڑہ مندر سے چھڑی مبارک (بھگوان شیو کی سونے کی چھڑی)، مہنت دیپندر گری جو اس کے متولی ہیں،کی قیادت میں سخت سیکورٹی بند وبست اور بم بم بولے نعروں کے بیچ پوتر گھپا کیلئے روانہ ہوئی۔
اس موقع پر مہنت دپندر گری نے میڈیا کو بتایا’’آج دشنامی کا دن ہے اور یہاں دشنامی اکھاڑہ سے چھڑی مبارک کا پوتر گھپا کی طرف سفر شروع ہوا‘‘۔
مہنت گرینے کہا’’آج یہاں پہلے سریشور مندر میں پوجا ہوگی، پھر شیو مندر پامپور میں، پھر شیور مندر بجبہاڑہ اننت ناگ اور پھر عشمقام سے ہوتے ہوئے چھڑی مبارک گوری شنکر مندر پہلگام پہنچے گی‘‘۔
ان کا کہنا تھا’’رات بھر پہلگام میں قیام ہوگا اس کے بعد۶؍اگست کو چندن واڑی میں،۷؍اگست کو شیش ناگ میں‘۸اگست کو پنچترنی میں اور۹؍اگست کو شرون پورنیما کے موقع پر چھڑی مبارک کو پوتر گھپا میں پہنچایا جائے گا‘‘۔
مہنت گری نے کہا کہ امسال بھی بڑی تعداد میں یاترا میں حصہ لیا لیکن موسم کی خرابی کی وجہ سے اس کو کچھ روز پہلے ہی معطل کیا گیا۔حکام کے مطابق امسال۴لاکھ سے زیادہ یاتریوں نے پوتر گھپا کا درشن کیا۔امسال موسم کی خرابی کی وجہ سے یاترا کو مقررہ تاریخ سے پہلے ہی اختتام پذیر ہوئی۔
صوبائی کمشنر کشمیر وجے کمار بدھوری نے ہفتے کو کہا’’حالیہ شدید بارشوں کی وجہ سے بالتل اور پہلگام دونوں راستوں پر مرمت اور دیکھ بھال کے کاموں کی ضرورت ہے ‘‘۔انہوں نے کہا’’یہ مشاہدہ کیا گیا ہے کہ کل (اتوار) سے راستوں پر نفری اور مشینری کی مسلسل تعیناتی کی وجہ سے ہم یاترا دوبارہ شروع نہیں کر پائیں گے ، لہذا یاترا ۳؍اگست سے دونوں راستوں سے معطل رہے گی‘‘۔
جموں کشمیر کے لیفٹیننٹ گورنر منوج سنہا نے۲ جولائی کو یاترا کے پہلے قافلے کو بھگوتی نگر جموں سے کشمیر کیلئے جھنڈی دکھا کر روانہ کیا تھا۔
قابل ذکر ہے کہ سال گذشتہ۵ لاکھ سے زیادہ یاتریوں نے یہ پوتر یاترا انجام دی تھی۔
