لہیہ//
آج صبح لہیہ کے علاقے میں ایک افسوسناک حادثے میں ایک لیفٹیننٹ کرنل اور ایک فوجی جوان جاں بحق ہو گئے، جب کہ تین فوجی افسر زخمی ہو گئے۔
حکام کے مطابق، فوجی قافلہ جب دربوک سے چونگتاش کی طرف جا رہا تھا تو صبح تقریباً ۳۰:۱۱ بجے کے قریب ایک بڑی چٹان ایک فوجی گاڑی پر آ گری۔
ایک سرکاری اہلکار نے بتایا کہ حادثے میں لیفٹیننٹ کرنل اور ایک جوان شہید ہوئے، جب کہ دو میجر رینک کے افسران اور ایک کیپٹن زخمی ہو گئے۔
انہوں نے مزید کہا’’زخمیوں کو علاج کے لیے لیہ میں قائم فوجی اسپتال منتقل کر دیا گیا ہے‘‘۔شہید ہونے والوں کی شناخت لیفٹیننٹ کرنل بھانو پرتاپ سنگھ اور لانس دفرادار دلجیت سنگھ کے طور پر کی گئی ہے۔
زخمیوں میں میجر ماینک شبھم، میجر امیت ڈکشت اور کیپٹن گورو شامل ہیں۔
ادھر کپواڑہ ضلع میں بس کی ٹکر سے اسکول ٹیچر جاں بحق جبکہ۱۰ مسافر زخمی ہو گئے۔
حکام کے مطابق، بدھ کے روز جموں کشمیر کے ضلع کپواڑہ میں ایک افسوسناک حادثے میں ایک سرکاری اسکول ٹیچر جاں بحق ہو گیا، جب کہ ۱۰مسافر زخمی ہو گئے۔
یہ واقعہ ہندواڑہ کے بہنی پورہ علاقے میں پیش آیا، جب ایک بس سڑک سے پھسل کر حادثے کا شکار ہو گئی۔
بس کی زد میں آکر ارشاد احمد لون نامی اسکول ٹیچر شدید زخمی ہو گئے، جو اس وقت سڑک پر پیدل چل رہے تھے۔
انہیں فوری طور پر اسپتال منتقل کیا گیا، تاہم وہ زخموں کی تاب نہ لاتے ہوئے دم توڑ گئے۔حادثے میں زخمی ہونے والے۱۰ دیگر افراد کا علاج جاری ہے۔
لیفٹیننٹ گورنر منوج سنہا نے حادثے پر گہرے رنج و غم کا اظہار کیا۔
انہوں نے کہا’’میں ہندواڑہ میں پیش آنے والے افسوسناک سڑک حادثے پر گہرے دکھ کا اظہار کرتا ہوں۔ اس غم کی گھڑی میں میری دعائیں ارشاد احمد لون کے اہل خانہ کے ساتھ ہیں، جنہوں نے اپنی جان کھو دی۔ میں زخمیوں کی جلد صحتیابی کے لیے دعا گو ہوں‘۔
اس ورا ن بٹوٹ علاقے میں جلیبی موڑ نالہ کے قریب ایک افسوسناک واقعہ پیش آیا، جہاں اچانک آنے والے سیلابی ریلے میں موٹر سائیکل بہہ جانے سے دو اساتذہ جاں بحق ہو گئے۔
جاں بحق ہونے والوں کی شناخت جگدیو سنگھ ٹھاکر اور سنجے شرما کے طور پر ہوئی ہے، جو دونوں ضلع ادھمپور کے گھورڈی بلاک کے رہائشی تھے۔
حادثے کے وقت وہ اپنے کام پر جا رہے تھے جب اچانک اْبھرتی ندی کے پانی نے ان کی بائیک کو بہا لیا۔
یہ واقعہ شدید بارش کے دوران پیش آیا، جس کے باعث پانی کی سطح میں اچانک اضافہ ہو گیا تھا۔
تھانہ انچارج باٹوٹے وجے کوٹوال کے مطابق، دونوں لاشیں نالے سے برآمد کر کے پوسٹ مارٹم کے لیے ضلع اسپتال رام بن منتقل کر دی گئی ہیں۔
دریں اثنا، پولیس نے واقعے کی مزید تحقیقات شروع کر دی ہے۔
