جموں//
جموں کشمیر کے ضلع کشتواڑ کے گھنے جنگلات میں چھپے ملی ٹینٹوں کے خلاف سیکورٹی فورسز نے پیر کی صبح دوبارہ وسیع پیمانے پر تلاشی مہم شروع کی ہے ۔
حکام کے مطابق یہ دہشت گرد ممنوعہ تنظیم حزب المجاہدین سے وابستہ ہیں اور ان میں دو اعلیٰ مطلوب کمانڈر شامل ہیں۔
ذرائع نے بتایا کہ اتوار کی دوپہر کو کشتواڑ کے دچھن اور ناگسینی کے درمیان واقع چرچی علاقے میں فوج اور پولیس نے مشترکہ آپریشن کا آغاز کیا تھا۔
اس دوران دہشت گردوں سے مختصر فائرنگ کا تبادلہ بھی ہوا، جس کے بعد ملی ٹینٹ گھنے جنگل کی طرف فرار ہونے میں کامیاب ہو گئے ۔
فائرنگ کے فوراً بعد اضافی کمک موقع پر روانہ کی گئی اور جنگل میں بڑے پیمانے پر سرچ آپریشن شروع کیا گیا۔ تاہم، اندھیرا ہونے کے باعث اتوار کی شام آپریشن وقتی طور پر روک دیا گیا تھا۔
پیر کی صبح آپریشن دوبارہ شروع کیا گیا۔ فورسز نے جدید ڈرون، سنفر ڈاگز اور دیگر جدید آلات کی مدد سے تلاشی کارروائی کو تیز کر دیا ہے ۔ حکام کے مطابق دہشت گردوں کے فرار ہونے کے تمام ممکنہ راستوں کو بند کر دیا گیا ہے اور آپریشن کو قریبی علاقوں تک وسعت دی گئی ہے ۔
ذرائع نے مزید بتایا کہ سخت موسمی صورتحال اور پہاڑی علاقہ ہونے کی وجہ سے سیکورٹی فورسز کو چیلنجوں کا سامنا ہے تاہم مشتبہ دہشت گردوں کو تلاش کرنے کے لیے آپریشن بھرپور انداز میں جاری ہے ۔
قابل ذکر ہے کہ گزشتہ کچھ مہینوں کے دوران کشتواڑ کے جنگلات میں دہشت گردوں کی نقل و حرکت میں اضافہ دیکھا گیا ہے جس کے پیش نظر فورسز نے یہاں اپنی موجودگی کو مضبوط کیا ہے ۔
