سرینگر///
جنوبی کشمیر میں۳ہزار۸سو۸۰ میٹر کی بلندی پر واقع پوتر گھپا کی طرف بالتل اور ننون بیس کیمپوں سے یاتریوں کے پہلے قافلے کی روانگی کے ساتھ ہی شری امرناتھ جی یاترا جمعرات کی صبح با قاعدہ شروع ہوئی۔
صوبائی کمشنر کشمیر وجے کمار بدھوری نے وسطی کشمیر میں بالتل بیس کیمپ سے یاتریوں کے پہلے قافلے کو جھنڈی دکھا کر پوتر گھپا کی طرف روانہ کیا جبکہ جنوبی کشمیر کے ننون پہلگام بیس کیمپ س سیول اور پولیس افسروں نے یاتریوں کو پوتر گھپا کی طرف روانہ کیا۔
حکام نے بتایا کہ یاتریوں کے پہلے قافلے میں مرد ، خواتین، بچے اور سادھو شامل تھے ‘گھپا کی طرف روانہ ہوئے ۔
ایک خاتون یاتری نے میڈیا کو بتایا’’پہلے جتھے کے ساتھ یاترا کرکے بہت خوشی ہو رہی ہے ، اتنی خوشی زندگی میں کبھی محسوس نہیں کی ہے ‘‘۔انہوں نے کہا’’ میں لوگوں سے اپیل کرتی ہوں کہ وہ یہاں آئیں اور بابا بولے ناتھ کا درشن کریں‘‘۔
لیفٹیننٹ گورنر منوج سنہا نے بدھ کی صرف بھگوتی نگر بیس کیمپ سے ۵ ہزار ۸سو۹۲یاتریوں کے پہلے قافلے کو کشمیر کے لئے روانہ کیا۔یاتریوں کا پہلا قافلہ دوپہر کو کشمیر پہنچا تھا جس کا یہاں ترتپاک استقبال کیا گیا۔
دریں اثنا حکومت اور شرائن بورڈ نے یاترا کے لئے سیکورٹی اور دیگر سہولیات کے فقید المثال انتظامات کئے ہیں۔
سیکورٹی ایجنسیوں کی جانب سے یاترا کے جڑواں راستوں پر سیکورٹی کے جامع انتظامات کئے گئے ہیں۔ اہم سرینگر، جموں قومی شاہراہ پر بھی سیکورٹی بڑھا دی گئی ہے ۔ زمین پر سیکورٹی اہلکاروں کی تعداد بڑھانے کے علاوہ حکام نے قومی شاہراہ کے ساتھ ساتھ چہرے کی شناخت کی نگرانی کے نیٹ ورک کو بھی مضبوط کیا ہے ۔
یاترا کے احسن انعقاد کو یقینی بنانے کے لئے کثیر سطحی سیکورٹی سسٹم نافذ کیا گیا ہے جموں و کشمیر کی حکومت نے امرناتھ گھپا کو جانے والے تمام راستوں کو ’نو فلائنگ زون‘قرار دیا ہے ، جس میں یاترا کے دوران ڈرون اور غبارے سمیت کسی بھی فضائی آلات کے استعمال پر پابندی ہے ۔
دریں اثنا شری امرناتھ جی یاترا کیلئے۵ہزار سے زیادہ یاتریوں پر مشتمل دوسرا قافلہ سخت سیکورٹی حصار میں جمعرات کی صبح کشمیر کیلئے روانہ ہوا۔
حکام نے بتایا کہ بھگوتی نگر بیس کیمپ سے جمعرات کی صبح۵ہزار۲۴۶یاتریوں کا دوسرا قافلہ کشمیر کے لئے روانہ ہوا۔انہوں نے کہا کہ یہ قافلہ۲۶۸چھوٹی بڑی گاڑیوں میں بالتل اور ننون پہلگام بیس کیمپوں کیلئے روانہ ہوا۔
ان نے مزید کہا کہ ان یاتریوں میں سے۳ہزار۳۵۳یاتری ننون پہلگام جبکہ ایک ہزار۹۹۳ یاتری بالتل کیمپ کے لئے روانہ ہوئے ۔
لیفٹیننٹ گورنر منوج سنہا نے بدھ کی صبح ۵ہزار سے زیادہ یاتریوں کو بھگوتی نگر بیس کمیپ سے روانہ کیا جن کا کشمیر پہنچنے پر پرتپاک استقبال کیا گیا۔
ادھر حکومت اور شرائن بورڈ نے یاتریوں کی سیکورٹی و دیگر سہولیات کیلئے تمام تر انتظامات کئے ہیں۔
امسال ۳۸دنوں پر محیط یہ یاترا؍۹اگست کو رکشا بندھن کے اختتام پذیر ہوگی۔
