نئی دہلی//
سنٹرل بورڈ آف سیکنڈری ایجوکیشن (سی بی ایس ای) اب دسویں جماعت کے طلباء کو ۲۰۲۶ سے شروع ہونے والے تعلیمی سال میں دو بار بورڈ امتحانات دینے کی اجازت دے گا۔
فروری میں پہلا امتحان لازمی ہوگا ، جبکہ مئی میں دوسرا امتحان ان طلباء کے لیے اختیاری ہوگا جو اپنے اسکور کو بہتر بنانا چاہتے ہیں۔
سی بی ایس ای نے دسویں جماعت کیلئے سال میں دو بار بورڈ امتحانات منعقد کرنے کے اصولوں کو منظوری دے دی ہے ، اس اقدام کی سفارش نئی قومی تعلیمی پالیسی (این ای پی) میں کی گئی ہے۔
پہلا مرحلہ فروری میں اور دوسرا مئی میں منعقد کیا جائے گا۔ سی بی ایس ای امتحانات کے کنٹرولر سنیم بھردواج نے کہا کہ دونوں مراحل کے نتائج کا اعلان بالترتیب اپریل اور جون میں کیا جائے گا۔
بھردواج کاکہنا تھا’’پہلے مرحلے کیلئے (طلبا کے لیے) حاضر ہونا لازمی ہوگی جبکہ دوسرا مرحلہ اختیاری ہوگا۔ طلباء کو سائنس ، ریاضی ، سماجی سائنس اور زبانوں میں سے کسی بھی تین مضامین میں اپنی کارکردگی کو بہتر بنانے کی اجازت ہوگی‘‘۔
منظور شدہ معیارات کے مطابق‘سرمائی اسکولوں کے کلاس ۱۰ کے طلباء کو کسی بھی مرحلے میں بورڈ کے امتحانات میں شرکت کا آپشن ملے گا۔ تعلیمی سیشن کے دوران داخلی تشخیص صرف ایک بار کی جائے گی۔
سی بی ایس ای نے فروری میں مسودہ اصولوں کا اعلان کیا ، جنہیں اسٹیک ہولڈرز کی رائے کے لیے پبلک ڈومین میں رکھا گیا تھا۔
نئی این ای پی نے سفارش کی ہے کہ بورڈ امتحانات کے’ہائی اسٹیک‘ پہلو کو ختم کرنے کے لیے ، تمام طلباء کو کسی بھی تعلیمی سال کے دوران دو مواقع پر امتحان دینے کی اجازت ہوگی۔
