ضمنی انتخاباتـ آپ کو دو، بی جے پی، کانگریس اور ترنمول کو ایک ایک سیٹ

نئی دہلی///
مختلف ریاستوں میں پانچ اسمبلی سیٹوں کے ضمنی انتخابات میں عام آدمی پارٹی ( آپ ) دو سیٹیں برقرار رکھنے میں کامیاب ہوئی ہے جبکہ بھارتیہ جنتا پارٹی (بی جے پی)، کانگریس اور ترنمول کانگریس نے ایک ایک سیٹ جیت لی ہے ۔
پیر کو چار ریاستوں میں۱۹جون کو ہونے والے انتخابات کے لیے ووٹوں کی گنتی میں، آپ نے پنجاب میں اپنی حکومت والی لدھیانہ ویسٹ سیٹ کو برقرار رکھا۔ اس کے ساتھ ہی، پارٹی نے حکمران بی جے پی کے خلاف جیت درج کرکے گجرات کی ویساوادر سیٹ کو بھی برقرار رکھا ہے ۔
گجرات میں کڈی سیٹ بی جے پی کے قبضے میں رہی۔کانگریس پارٹی نے کیرالہ میں حکمراں لیفٹ ڈیموکریٹک فرنٹ (این ڈی ایف) کو نیلمبور سیٹ پر الٹ پھیر کرتے ہوئے شکست دی۔
آپ امیدوار سنجیو اروڑہ نے لدھیانہ مغربی اسمبلی سیٹ پر قریبی حریف کانگریس کے بھارت بھوشن آشو کو شکست دی۔
آپ لیڈر اور پنجاب کے وزیر اعلی بھگونت مان نے لدھیانہ ویسٹ سیٹ کی کامیابی پر سوشل میڈیا پوسٹ میں لکھا ’’بڑے مارجن سے جیت یہ ظاہر کرتی ہے کہ ریاست کے لوگ ہماری حکومت کے کام سے بہت خوش ہیں۔ ہم ضمنی الیکشن کے دوران عوام سے کیے گئے ہر وعدے کو ترجیحی بنیادوں پر پورا کریں گے ‘‘۔
پنجاب کانگریس کے صدر امریندر سنگھ راجہ وارنگ نے الزام لگایا کہ عام آدمی پارٹی نے اس سیٹ کو جیتنے کے لیے پوری سرکاری مشینری کا استعمال کیا ہے ۔
گجرات اسمبلی کی دو نشستوں پر ہوئے ضمنی انتخابات میں ایک سیٹ بھارتیہ جنتا پارٹی (بی جے پی) اور ایک عام آدمی پارٹی (آپ) کے کھاتے میں گئی ہے ۔ آپ کے اٹالیا گوپال نے ریاستی اسمبلی کی ویساوادر سیٹ پر بی جے پی امیدوار کریت پٹیل کوشکست دی۔
ریاست کی کڈی (محفوظ) سیٹ پر بی جے پی کے امیدوار راجیندر کمار (راجو بھائی) دنیشور چاوڑا نے کانگریس کے رمیش بھائی چاوڑا کوشکست دی۔
کیرالہ میں، کانگریس امیدوار آریدان شوکت نے نیلمبور سیٹ پر حکمران لیفٹ ڈیموکریٹک فرنٹ (ایل ڈی ایف) کی مضبوط انتخابی مہم کا سامنا کرتے ہوئے حکمران کمیونسٹ پارٹی آف انڈیا (مارکسسٹ) (سی پی آئی-ایم) کے امیدوار ایم سوراج کو شکست دی۔
کانگریس کی جنرل سکریٹری پرینکا گاندھی نے اس جیت پر کہا ’’ہم نے ایک ٹیم کے طور پر کام کیا، ہر کوئی پرعزم تھا اور ایک ہی مقصد پر مرکوز تھا، یہ اس کامیابی کا سب سے اہم سبق ہے ۔ آریدان شوکت کو دل کی گہرائیوں سے مبارکباد، جن کی لگن اور خدمت چمک اٹھی ہے ‘‘۔
مغربی بنگال کی کالی گنج سیٹ حکمراں ترنمول کانگریس کے کھاتے میں رہی۔ اس نشست پر پارٹی کی امیدوار علیفہ احمد نے کامیابی حاصل کی۔ محترمہ علیفہ نے اپنے قریبی حریف بھارتیہ جنتا پارٹی (بی جے پی) کے آشیش گھوش کو شکست دی۔