امر ناتھ یاترا کی تیاریوں کے سلسلے میں پہلگام میں مشترکہ مشق

سرینگر//
سالانہ امرناتھ یاتراکیلئے سکیورٹی اور ایمرجنسی تیاریوں کے تحت اسٹیٹ ڈیزاسٹر ریسپانس فورس (ایس ڈی آر ایف) اور نیشنل ڈیزاسٹر ریسپانس فورس (این ڈی آر ایف) نے جمعے کے روز پہلگام میں ایک مشترکہ ماک ڈرل (فرضی مشق) انجام دی۔
اس مشق کا مقصد یاترا کے دوران کسی بھی ہنگامی صورتحال سے نمٹنے کے لیے تیاریوں کا جائزہ لینا اور فیلڈ ریسپانس کو مؤثر بنانا تھا۔
ڈرل کے دوران ایس ڈی آر ایف اور این ڈی آر ایف اہلکاروں نے جدید آلات، ایمبولینس سروسز، میگا فونز اور موبائل کنٹرول رومز کا مظاہرہ کیا۔
ضلعی انتظامیہ، پولیس، صحت عامہ اور دیگر متعلقہ محکموں کے افسران بھی اس مشق میں موجود تھے اور انہوں نے آپس میں تال میل کی مشق کو کامیاب بنانے میں کلیدی کردار ادا کیا۔
افسران کے مطابق’یہ مورک ڈرل امرناتھ یاترا کے دوران کسی بھی غیر متوقع صورتحال میں موثر اور فوری ردعمل دینے کی صلاحیتوں کو مضبوط بنانے کی ایک کوشش ہے ‘۔
واضح رہے کہ سالانہ امرناتھ یاترا ؍۳جولائی سے شروع ہو کر ۹؍اگست تک جاری رہے گی، اور لاکھوں یاتری کشمیر کے دشوار گزار راستوں سے ہوتے ہوئے ۳۸۸۰میٹر بلند غار میں امرناتھ لنگم کی درشن کے لیے پہنچیں گے ۔
انتظامیہ کا کہنا ہے کہ اس قسم کی مشقیں یاتریوں کی جان و مال کے تحفظ اور قدرتی آفات سے بروقت نمٹنے کیلئے ناگزیر ہیں۔