سنہا کا دورہ پہلگام‘عادل احمد کی اہلیہ کو سرکاری نوکری دی

سرینگر//
جموں کشمیر کے لیفٹیننٹ گورنر منوج سنہا نے ہفتے کے روز پہلگام کے ہاپت نار علاقے کا دورہ کرکے وہاں پہلگام حملے میں سیاحوں کو بچانے کی کوشش کے دوران جاں بحق ہونے والے عادل احمد کے اہلخانہ سے ملاقات کی۔
اس موقع پر انہوں نے عادل احمد کی اہلیہ کو محکمہ فشریز میں سرکاری نوکری دی۔
لیفٹیننٹ گورنر نے میڈیا کو بتایا’’یہ پہلے ہی طے کیا گیا تھا کہ عادل احمد کے اہلخانہ سے ملنا ہے ، وزارت امور داخلہ کی طرف سے جموں وکشمیر انتظامیہ کے ذریعے ان کے خاندان کو مالی امداد بھی فراہم کی گئی تھی اور بہت سی ریاستوں نے بھی مدد کی تھی‘‘۔
ایل جی نے کہا’’آج ان کی اہلیہ کو محکمہ فشریز میں سرکاری نوکری دی گئی‘‘۔ان کا کہنا تھا’’میں سمجھتا ہوں کہ یہ ان کیلئے انتظامیہ کا ایک تشکر ہے ، ان کے والد اور اس گائوں کے لوگوں کے ساتھ بات ہوئی وہ چاہتے ہیں کہ علاقے میں روزگار کے موقعے بڑھ جائیں اس پر غور کیا جائے گا‘‘۔
واضح رہے کہ عادل احمد پہلگام میں بیسرن وادی میں۲۲؍اپریل کو ہوئے حملے میں سیاحوں کو بچانے کی کوشش کے دوران جاں بحق ہوئے تھے ۔
دریں اثنا جموں کشمیر کے لیفٹیننٹ گورنر‘ منوج سنہا کی طرف سے پہلگام حملے میں جاں بحق ہونے والے عادل حسین کی اہلیہ کو سرکاری ملازمت کا خط دینے کے چند گھنٹوں کے بعد حکمران جماعت نیشنل کانفرنس نے کہا کہ تقرری کا خط منتخب حکومت کے فشریز محکمے نے پہلے ہی تیار کر رکھا تھا۔
واضح رہے کہ عادل حسین ۲۲؍اپریل کو پہلگام حملے میں سیاحوں کو بچانے کی کوشش کے دوران جاں بحق ہوئے تھے ۔
سنہا نے ہفتے کے روز پہلگام کے ہاپت نار کا دورہ کیا اور وہاں عادل حسین کے اہلخانہ کے ساتھ ملاقات کی اور ان کی اہلیہ کو سرکاری نوکری کا خط دیا۔
نیشنل کانفرنس کے ترجمان تنویر صادق نے ’ایکس‘پر ایک پوسٹ میں کہا’’ہم لیفٹیننٹ گورنر صاحب کا شکریہ ادا کرتے ہیں کہ انہوں نے نوکری کا آرڈر دیا جو کہ وزیر جاوید احمد ڈار کی زیرقیادت منتخب حکومت کے تحت محکمہ فشریز نے پہلے ہی تیار کیا تھا‘‘۔
صادق نے کہا’’یہ منتخب حکومت کی جانب سے دکھائی گئی پختگی اور ذمہ داری کی عکاسی کرتا ہے ، ہم نے انا کو آڑے نہیں آنے دیا، بلکہ دکھ کی گھڑی میں عادل کے خاندان کے ساتھ کھڑے رہے ‘‘۔
ان کا کہنا تھا’’بالکل اسی طرح جیسے پہلے ، منتخب حکومت نے پونچھ میں گولہ باری سے جاں بحق ہونے والوں کے اہلخانہ کے ایک فرد کے لیے اسی طرح کے ملازمت کے آرڈر تیار کیے تھے ، جو بعد میں وزیر داخلہ کے ذریعہ تقسیم کیے گئے جب وزیر اعلیٰ نے گولہ باری کے فوراً بعد متاثرہ خاندانوں کا ذاتی طور پر دورہ کیا اور ذاتی طور پر یہ ملازمتیں دینے کا عہد کیا‘‘۔
این سی ترجمان اعلیٰ نے پوسٹ میں مزید کہا’’درد کے لمحات میں، سیاست کو ہمدردی کا راستہ بنانا چاہیے ۔‘‘