اگلے ایک ہفتے تک موسمی صورتحال دگرگوں رہنے کا امکان

سرینگر//
محکمہ موسمیات کے مطابق وادی کشمیر میں کم وبیش اگلے ایک ہفتے کے دوران موسمی صورتحال دگر گوں رہنے کا امکان ہے ۔
محکمے کی ایڈوئزری کے مطابق وادی میں۳۰؍اور ۳۱مئی کو گرج چمک کے ساتھ درمیانی سے بھاری بارشوں کا امکان ہے اور اس دوران تیز ہوائیں بھی چل سکتی ہیں۔
موسمیات محکمے کے ایک ترجمان نے بتایا کہ وادی میں۲۸؍اور۲۹مئی کو دوپہر کے بعد گرج چمک کے ساتھ ہلکی بارشوں کا امکان ہے ۔
ترجمان نے کہا کہ۳۰؍اور۳۱مئی کو کئی مقامات پر گرج چمک کے ساتھ ہلکی سے درمیانی درجے کی بارشیں ہوسکتی ہیں اور اس دوران تیز ہوائیں بھی چل سکتی ہیں اور بارشوں کے تیز مرحلوں کا بھی امکان ہے ۔ان کا کہنا ہے کہ وادی میں یکم سے ۳جون تک بھی کہیں کہیں ہلکی بارشوں کے مرحلوں کو خارج از امکان قرار نہیں دیا جا سکتا ہے ۔
محکمے کی ایڈوئزری کے مطابق وادی میں۳۰؍اور۳۱مئی کو گرج چمک کے ساتھ درمیانی سے بھاری بارشوں کا امکان ہے اور اس دوران تیز ہوائیں بھی چل سکتی ہیں۔وادی میں گذشتہ شب تیز بارشوں، تیز ہوائوں اور شدید ژالہ باری سے معمولات زندگی در و برہم ہو کر رہ گئے ۔
وادی میں جہاں کئی علاقوں میں سڑکوں پر درخت گر آنے سے ٹرانسپورٹ کی نقل و حمل متاثر ہوگئی وہیں سری نگر ہوائی اڈے پر بھی دو پروازیں منسوخ ہوگئیں۔
اطلاعات کے مطابق وادی کے بعض علاقوں میں شدید ژالہ باری سے میوہ باغات کو نقصان پہنچا جبکہ کچھ تیز ہوائوں نے درخت اکھاڑ دئے اور مکانوں کے چھتوں کو بھی نقصان پہنچایا۔
اس دوران ناساز گار موسمی صورتحال کے باوجود وادی کشمیر کو ملک کے باقی حصوں کے ساتھ جوڑنے والی سرینگر، جموں قومی شاہراہ پر ٹریفک کی نقل و حمل جاری ہے ۔
ٹریفک حکام نے بدھ کی صبح بتایا’’قومی شاہراہ پر مسافر بر دار گاڑیوں کی دو طرفہ نقل و حمل جاری ہے تاہم مال بر دار گاڑیوں کو سری نگر سے جموں جانے کی اجازت ہے ‘‘۔انہوں نے مسافروں سے لین ڈسپلن پر عمل کرنے اور اوورٹیکنگ سے پر ہیز کرنے کی تاکید کی ہے ۔
حکام نے بتایا کہ جنوبی کشمیر کے ضلع شوپیاں کو صوبہ جموں کے پونچھ اور راجوری اضلاع کے ساتھ جوڑنے والے تاریخی مغل روڈ، وادی کو لداخ یونین ٹریٹری کے ساتھ جوڑنے والی لیہہ ، سری نگر شاہراہ پر سنتھن روڈ پر متعلقہ ایجنسیوں کی طرف سے گرین سگنل ملنے کے بعد ہی ٹریفک کو چلنے کی اجازت دی جائے گی۔