پونچھ میںگولہ باری سے ہوئی تباہی ایک’المیہ‘ہے :راہل

جموں//
سینئر کانگریس لیڈر اور لوک سبھا میں قائد حزب اختلاف راہل گاندھی نے پونچھ میں پاکستانی گولہ باری سے ہونے والی تباہی کو المیہ قرار دیتے ہوئے کہا کہ گولہ باری سے کئی لوگوں کی جانیں گئی ہیں اور بڑے پیمانے پر نقصان ہوا ہے ۔
انہوں نے کہا’’لوگوں نے مجھے دو تین چیزیں قومی سطح پر اٹھانے کو کہا ہے جو میں کروں گا‘‘۔
کانگریسی لیڈر نے ان باتوں کا اظہار ہفتے کو جموں وکشمیر کے ضلع پونچھ میں گولہ باری سے متاثرہ علاقوں کا دورہ کرنے کے دوران نامہ کے ساتھ مختصر بات کرتے ہوئے کیا۔
پونچھ میں گولہ باری سے ہوئی تباہی کے بارے میں پوچھے جانے پر انہوں نے کہا’’یہ بہت بڑا المیہ ہے ، کئی لوگوں کی جانیں گئی ہیں، بہت بڑا نقصان ہوا ہے ‘‘۔ان کا کہنا تھا’’میں نے لوگوں کے ساتھ بات چیت کی اور ان کے مسائل و مشکلات کو سمجھنے کی کوشش کی‘‘۔
گاندھی نے کہا’’لوگوں نے مجھے دو تین چیزیں قومی سطح پر اٹھانے کو کہا ہے جو میں کروں گا‘‘۔
اس سے پہلے راہل گاندھی نے ہفتے کو پونچھ میں ایک اسکول کا دورہ کیا اور پاکستان کی سرحد پار گولہ باری سے متاثرہ طلبہ سے بات چیت کی۔
گاندھی نے طلبہ سے کہا کہ اس مسئلے کا جواب دینے کا ان کا طریقہ یہ ہونا چاہیے کہ وہ واقعی محنت سے پڑھیں اور کھیلیں۔ ’’اب، آپ نے خطرہ اور ایک خوفناک صورتحال دیکھی ہے، لیکن فکر نہ کریں، سب کچھ واپس معمول پر آجائے گا۔ اس مسئلے کا جواب دینے کا آپ کا طریقہ یہ ہونا چاہیے کہ آپ واقعی محنت سے پڑھیں اور کھیلیں اور اسکول میں بہت سے دوست بنائیں‘‘۔
گاندھی نے پونچھ میں شہری علاقوں اور شری گرو سنگھ سبھا گردوارہ کا بھی دورہ کیا جو پاکستان کی سرحد پار گولہ باری سے متاثر ہوئے تھے۔
لوک سبھا کے لیڈر آف اپوزیشن نے ایکس پر اپنے دورے کے بارے میں بھی پوسٹ کیا۔ اس بات کا یقین دلایا کہ وہ لوگوں کی مانگوں اور مسائل کو قومی سطح پر اٹھائیں گے۔
ایکس پر ان کاکہنا تھا’’آج میں نے ان خاندانوں سے ملاقات کی جو پونچھ میں پاکستان کی بمباری میں زندگی سے ہاتھ دھو بیٹھے۔ ٹوٹے گھر، بکھری ہوئیں چیزیں، نم آنکھیں اور عزیزوں کی کھو جانے کی دردناک کہانیاں ہر گوشے میں… یہ محب وطن خاندان ہر بار جنگ کا سب سے بڑا بوجھ بہادری اور وقار کے ساتھ اٹھاتے ہیں۔ ان کی بہادری کو سلام‘‘۔
گاندھی کا مزید کہنا تھا’’میں متاثرہ خاندانوں کے ساتھ مضبوطی سے کھڑا ہوں – میں یقینی طور پر ان کے مطالبات اور مسائل کو قومی سطح پر اٹھاؤں گا۔‘‘
بعد ازاںراہل گاندھی نے ہفتے کے روز اپنے دورہ پونچھ کے دوران سنگھ سبھا گرد وارے میں حاضری دی۔انہوں نے اس دوران پاکستانی گولہ باری سے جاں بحق ہونے والے۵۰سالہ سابق فوجی امر جیت سنگھ کے اہلخانہ کے ساتھ بھی ملاقات کی اور ان کے ساتھ ہمدردی کا اظہار کیا۔
گاندھی نے سوگوار کنبے کے ساتھ تعزیت کی اور انہیں ہر ممکن تعاون کرنے کی یقین دہانی کی۔واضح رہے کہ راہل گاندھی ہفتے کی صبح پونچھ پہنچے جہاں انہوں نے پاکستانی گولہ باری سے متاثرہ علاقوں کا دورہ کیا اور متاثرین کے ساتھ بات چیت بھی کی۔