فخر زمان پی ایس ایل کی تاریخ میں پاور پلے اوورز میں سب سے زیادہ چھکے لگانے والے بیٹر بن گئے

لاہور// لاہور قلندرز کے اوپنر فخر زمان پی ایس ایل کی تاریخ میں پاور پلے اوورز میں سب سے زیادہ چھکے لگانے والے بیٹر بن گئے ہیں۔
35 سالہ فخر زمان اب تک پی ایس ایل میں پاور پلے اوورز میں 37 چھکے لگا کر پہلے نمبر پر ہیں۔
کولن منرو اور محمد رضوان 32، 32 چھکوں کے ساتھ اس فہرست میں دوسرے، لیوک رونکی 28 چھکے لگا کر تیسرے جب کہ کامران اکمل 27 چھکوں کے ساتھ اس فہرست میں چوتھے نمبر پر ہیں۔
واضح رہے کہ پاکستان سپرلیگ (پی ایس ایل) 10کے 16ویں میچ میں لاہور قلندرز نے ملتان سلطانز کو 5 وکٹ سے ہرادیا۔
لاہور کے قذافی اسٹیڈیم میں کھیلے گئے میچ میں لاہور قلندرز نے ملتان سلطانز کے خلاف ٹاس جیت کر فیلڈنگ کا فیصلہ کیا۔
ملتان سلطانز نے پہلے کھیلتے ہوئے مقررہ 20 اوورز میں 3 وکٹ پر 185 رنز بنائے۔ ملتان سلطانز کےکپتان محمد رضوان نے 76 اور کامران غلام نے ناقابل شکست 52 رنز بنائے۔
لاہور قلندرز کی جانب سے ٹام کیرن، حارث رؤف اور ڈیرل مچل نے ایک، ایک وکٹ لی۔
لاہور قلندرز نے 186 رنز کا ہدف 19 اوورز میں 5 وکٹ کے نقصان پر حاصل کرلیا۔ فاتح ٹیم کی جانب سے ڈیرل مچل نے 64 رنز کی اننگز کھیلی۔
ان کے علاوہ سکندر رضا 40 رنز بنا کر ناٹ آؤٹ رہے، عبداللہ شفیق نے 34 رنز بنائے۔
ملتان سلطانز کی جانب سے عبید شاہ نے دو کھلاڑیوں کو آؤٹ کیا۔