دوبئی//
انٹرنیشنل کرکٹ کونسل (آئی سی سی) نے چیمپئنز ٹرافی 2025ء کے فائنل کی اختتامی تقریب کے دوران پاکستان کرکٹ بورڈ (پی سی بی) کے حکام کی غیر موجودگی پر وضاحت پیش کر دی۔
یہ بیان اس وقت سامنے آیا جب ’جیو نیوز‘ نے عالمی کرکٹ کے منتظم ادارے (آئی سی سی) سے میزبان پاکستان کی چمپئینز ٹرافی کی اختتامی تقریب کے معاملے پر تبصرہ طلب کیا۔
آئی سی سی کے ترجمان نے بتایا کہ پی سی بی مینجمنٹ کمیٹی کے چیئرمین محسن نقوی دراصل ٹورنامنٹ کے میزبان بورڈ کے نامزد نمائندے تھے اور اُن کو تقریب میں مدعو کیا گیا تھا لیکن وہ شرکت نہ کر سکے۔
اُنہوں نے کہا کہ محسن نقوی دستیاب نہیں تھے اس لیے فائنل کے لیے دبئی کا سفر نہیں کیا۔
آئی سی سی کے ترجمان نے اختتامی تقریب میں پاکستانی نمائندگی کے فقدان پر تنقید کا جواب دیتے ہوئے بتایا کہ انٹرنیشنل کرکٹ کونسل صرف ٹورنامنٹ کے میزبان بورڈ کے سربراہ، جیسے صدر، نائب صدر، چیئرمین یا چیف ایگریکٹیو کو ایوارڈ تقریب میں شرکت کے لیے مدعو کرتی ہے اور دیگر بورڈ حکام چاہے مقام پر موجود ہوں یا نہیں، اسٹیج پر تقریب تقسیم انعامات کا حصّہ نہیں بنتے۔
اُنہوں نے کہا کہ یہ پروٹوکول صرف چیمپئنز ٹرافی کے لیے مخصوص نہیں بلکہ تمام ٹورنامنٹس میں مستقل طور پر نافذ رہا ہے۔
واضح رہے کہ چیمپئنز ٹرافی کا فائنل دبئی میں کھیلا گیا کیونکہ بھارتی حکومت نے اپنی ٹیم کو پاکستان بھیجنے سے انکار کر دیا تھا تو بھارتی ٹیم کے تمام میچز پاکستان سے دبئی منتقل کر دیے گئے تھے۔
اگرچہ ٹورنامنٹ کے بیشتر میچز پاکستان میں کھیلے گئے لیکن چمپئینز ٹرافی کے فائنل کی دبئی میں ہونے والی تقریب کے دوران میزبان ملک کی عدم شرکت پر سوالات اٹھائے جا رہے ہیں۔
