جموں وکشمیر میں کورونا وائرس کے یومیہ کیسوں میں اچھال‘۲۵؍افراد کی رپورٹ مثبت

سرینگر//
جموںکشمیر میں کورونا وائرس کے یومیہ کیسوں میں بدھ کے روز اضافہ دیکھنے کو ملا ۔
بدھ کے روز مزید۲۵؍افراد کی رپورٹ مثبت آنے کے بعد یوٹی میں فی الوقت ایک سو ایکٹیو کیس ہے ۔
سرکاری ذرائع نے بتایا کہ بدھ کے روز جموں وکشمیر میں مزید ۲۵؍افراد کی رپورٹ مثبت آئی ہے ۔انہوں نے بتایا کہ جموں میں۱۳؍اور سری نگر میں ۱۲مریضوں میں کووڈ کی تشخیص پائی گئی۔
ذرائع نے بتایا کہ پچھلے کئی دنوں سے یومیہ کیسوں میں لگاتار اضافہ دیکھنے کو ملا ہے اور تین روز کے دوران کیسوں میں ۳۰فیصدی کا اضافہ ہوا ہے ۔
دریں اثنا ڈاکٹروں نے لوگوں سے اپیل کی ہے کہ وہ کووڈ رہنما اصولوں پر سختی کے ساتھ عمل کریں کیونکہ ملک کے ساتھ ساتھ جموں وکشمیر میں بھی یومیہ کیسز لگاتار بڑھ رہے ہیں جس کے پیش نظر احتیاطی تدابیر پر عملدرآمد ناگزیر ہے ۔
ڈاکٹروں کا مزید کہنا ہے کہ یومیہ کیسز میں ہو رہے لگاتار اضافہ کو دیکھتے ہوئے ماسک کے استعمال کے ساتھ ساتھ بھیڑ بھاڑ والی جگہوں پر جانے سے گریز کیا جانا چاہئے ۔